Në grupin e parë të Divizionit C në Ligën e Kombeve, Shqipëria ra në short me Izraelin dhe Skocinë. Një short i vështirë, por edhe i pranueshëm, pasi kundërshtarët janë pak a shumë në nivelin e përfaqësueses tonë. Por në kuadër të ndeshjeve të vjeshtës për këtë grup ka që tani surpriza dhe Izraeli e bën “surprizën” e radhës, duke e degdisur ndeshjen me Shqipërinë në një stadium periferik të tij. Izraelitët, pasi u mundën në shtëpi në një stadium 30 mijë vendesh nga Sadiku & Co. nuk dëshirojnë që të përsëritin një turpërim të ngjashëm.
Si rrjedhojë, ndeshja që në teori mund të luhej në stadiumin “Ramat Gan” (41583 spektatorë), “Teddy Stadium” (34000) apo “Sammy Ofer” (30870), ka përfunduar në “Turner Stadium”. Impianti prej 16126 vendesh i përket skuadrës së Hapoel Ber Shevës dhe ndonëse është i rikonstruktuar së fundmi, është tepër i vogël në krahasim me të tjerët që ka në Izrael. Ndeshja e 14 tetorit do të jetë e para zyrtare që Izraeli luan në historin e tij këtë impiant, ndërsa ndeshjen me Skocinë do ta luajë në “Samy Offer”, aty ku pësoi humbjen 3-0 përballë Shqipërisë. /Pamfleti.com