Pasuria dhe ndikimi i miliarderit Elon Musk, janë armë të vlefshme për të përhapur më tej populizmin e MAGA-s në Evropë. Kështu është shprehur në një intervistë për Bloomberg, Steve Bannon, ish-ndihmësi i lartë i presidentit të zgjedhur të Shteteve të Bashkuara, Donald Trump.
Musk dhe Bannon janë ndër aleatët më me ndikim të Trump edhe pse marrëdhëniet mes dy burrave vështirë se mund të përshkruhen si miqësore.
“Paraja dhe informacioni janë armët taktike bërthamore të politikës moderne dhe Musk mund t’i vendosë të dyja në një shkallë të paprecedentë. Ai sapo shpenzoi 250 milionë për të ndihmuar Trumpin të zgjidhet President në SHBA”, tha Bannon, duke i sugjeruar Musk që të investojë te populistët në Europë.
Sipas Bannon, nëse Musk investon të njëjtën sasi parash në të gjithë Evropën, ai do ta kthejë çdo vend drejt një axhende populiste.
“Nuk ka asnjë qeveri të qendrës së majtë në Evropë që do të jetë në gjendje t’i rezistojë këtij sulmi”, thotë Bannon, i cili pak ditë më parë u përplas me Musk për programin e vizave të punës për punonjësit e aftë të promovuar nga ky i fundit në SHBA.