Vaksinimi i fëmijëve mbi 5 vjeç, është gjithmonë e më afër, pasi kompanitë Pfizer dhe Biontech bënë me dije se një vaksinë me dozë më të ulët, ishte e sigurt dhe e efektshme te grupmosha 5-11 vjeç.
Por prindërit do të kenë edhe pak kohë për të menduar nëse do t’i vaksinojnë ose jo të vegjlit e tyre. Deri në marrjen e dritës jeshile janë ende 4 hapa që duhet ende të ndodhin;
Pfizer duhet të aplikojë për përdorim emergjent të vaksinës. FDA duhet të modifikojë udhëzimin për përdorim emergjent për përfshirjen e më të vegjëlve CDC duhet të rekomandojë përdorimin e vaksinës për këtë grupmoshë. Pasi CDC dhe FDA ta aprovojnë, vaksinimi mund të nisë.
“Mendoj se do të bëjë një ndryshim të madh në luftën kundër Covid-19 dhe prindërit dhe mësuesit po e prisnin diçka të tillë.
Njoftimi i Pfizer nuk mund të vinte në moment më të përshtatshëm, ndërsa infektimet mes të miturve janë rritur ndjeshëm në SHBA, dhe përbëjnë 26 për qind të të gjitha rasteve në rang kombëtar”, deklaroi Dr. Tanya Altmann, pediatre.
Ekspertët e shëndetësisë besojnë se vaksina për fëmijët mund të jetë e disponueshme nga fundi i tetorit, por ekspertët druhen se bindja e prindërve mund të jetë sfidë më vete.
Shtetet e Bashkuara numërojnë mbi 675 mijë vdekje nga koronavirusi, më shumë se sa viktimat e shënuara gjatë pandemisë së gripit në vitin 1918.