Ilir Meta pati një prononcim të shkurtër për gazetarët këtë të shtunë ku u pyet se nëse do të vazhdojë bashkëpunimin me mazhorancën nëse kjo e fundit fiton zgjedhjet më 25 prill.
Meta u la të kuptohet se nuk do ta pranojë një fitore të mundshme të Ramës, duke thënë se se 25 prilli do të jetë një referendum i popullit.
“Treni i integrimit është nisur, mjerë ai që i del përpara”, tha Meta.
“Besoj se kam qenë dhe jam i qartë se 25 Prilli do të jetë referendum i qartë i popullit për të ardhmen europiane. Jam besimplotë për këtë gjë dhe do të vazhdoj të jem i përkushtuar për integrimin e Shqipërisë.
Treni i integrimit është nisur, mjerë ai që i del përpara sepse nuk ndalet më jo më 25 prill, por as pas 25 prillit”, tha Meta.
Meta u shpreh nga Shkodra se liderët politikë që do të tentojnë të fusin figura me probleme me ligjin në zgjedhje do të ndëshkohen nga populli.
“Fakti që ne kemi miratuar një ligj për dekriminalizimin është një tregues i qartë i një problemi tepër serioz dhe fenomeni tepër kritik.
Se kush i ka promovuar, se kush i merr në mbrojtje, kjo dihet. U bëj thirrje të gjithë forcave politike të distancohen nga persona që kanë pasur probleme me dekriminalizimin dhe të promovojnë sa më shumë figura të reja, figura me integritet dhe së dyti dua t’i siguroj që populli shqiptar do jetë i qartë për ti ndëshkuar me votë ata që do të përpiqen të marrin direkt apo në mënyrë indirekte persona të tillë thjesht për disa vota më shumë”, tha Meta.