Partia Socialiste dhe Partia Demokratike kanë dështuar sa i takon komisioneve hetimore. Vetëm në katër vitet e fundit Partia Demokratike dhe Partia Socialiste kanë nisur investigimin për 9 çështje nga të cilat askush deri më sot nuk ka dalë para drejtësisë. Edhe pse dy partitë politike shpesh i kanë ngritur me bujë dhe me shpresë të madhe komisionet hetimore, puna e këtyre komisioneve asnjëherë nuk ka shkuar deri në fund.
Pak ditë më parë gazeta e deklaroi se dhe Komisioni Hetimor i Tahirit do të dështonte për shkak se me mbylljen e sesionit parlamentar, komisionit do t’i mbaronte afati i punimeve. Detaj që sot është konfirmuar, pasi Komisioni Hetimor që PD ngriti për të identifikuar lidhjet e ish-ministrit Tahiri me drogën, me përjashtim të dy mbledhjeve të para ku u hodhën akuza e kundërakuza mes palëve politike, nuk e përmbylli misionin pasi deputetët nuk u mblodhën më duke zvarritur punën hetimore.
Por teksa i fundit ndër komisionet hetimore ka qenë ai për çështjen “Tahiri”, në katër vitet e fundit, gjatë 2014-2018, janë ngritur nga PS dhe PD dhe 8 komisione të tjera. Me ardhjen në pushtet të socialistëve, PD ngriti një komision hetimor në lidhje me shkarkimet e bëra në administratë. Nën kryesinë e deputetit Genc Pollo, PD ngriti një komision hetimor me qëllim që të verifikonte ligjshmërinë e emërimeve dhe shkarkimeve në administratë por që për fat të keq nuk e përmbylli misionin e tij. Krahas këtij komisioni demokratët ngritën dhe një tjetër komision për të verifikuar zbatimin e legjislacionit në fuqi për administrimin e bazave të të dhënave shtetërore tatimore për shkak të bllokimit që pati sistemi për disa ditë. Nën drejtimin e Arben Ristanit, komisioni edhe pse arriti të mblidhte të dhëna, nuk arriti të bënte asnjë kallëzim penal në lidhje me çështjen e bllokimit të serverëve.
Prokuroria “hedh poshtë” PS
Por edhe pse shumica e komisioneve hetimore kanë dështuar, socialistët kanë arritur që të çojnë njërin prej tyre deri në fund si dhe të bëjnë pranë organit të akuzës kallëzim penal. Komisioni hetimor i ngritur nga socialistët për privatizimin e OSSH nga ana e PS, arriti në konkluzionin se djali i ish-kryeministrit Berisha, Shkëlzen Berisha ka qenë i përfshirë në aferë së bashku me sekserin Nuel Kalaj. Por edhe pse kryetari i këtij komisioni, Taulant Balla bëri një kallëzim penal në prokurori, organi i akuzës deri më sot nuk ka ndërmarrë asnjë veprim duke hedhur poshtë punën e komisionit.
Sakaq, në lidhje me çështjen CEZ, edhe PD ka ngritur një komision hetimor për çështjen e rimarrjes nga shteti të 76% të aksioneve të CEZ Shpërndarje. Komision që përfundoi punën pa arritur në asnjë konkluzion. Por krahas komisioneve të ngritura për çështjen CEZ, PD gjatë këtyre viteve ka ngritur gjithashtu edhe 4 komisione të tjera, analizon Sot. Një komision për shkarkimin e anëtarëve të KLD Elvis Çefa dhe Lulzim Lelçaj, një tjetër në lidhje me akuzat për përfshirjen e Forcave të Armatosura në veprimtari të kundërligjshme, për çështjen e përgjimeve dhe pajisjen Imsi Chatcher, si dhe për kontrolluar zbatimin e legjislacionit në fuqi gjatë procesit të lëvizjeve të burimeve njerëzore në Policinë e Shtetit. Komisione që janë mbyllur pa asnjë përfundim dhe që më së shumti veçse kanë shkaktuar kosto ekonomike.