Grida Duma është përplasur me Lorenc Vangjelin në emisionin që drejton vetë, për shkak të dënimit të Ervin Salianjit.
Ajo u shfaq e revoltuar, duke ngritur dhe zërin, ndërsa ka “harruar” se ishte moderatorja e emisionit, jo e dashura e Salianjit.
Grida Duma: Ndodhi dënimi, kënaquni se e keni arritur. Jeni mirë sonte…
Vangjeli: Më duhet t’ju korrigjoj dhe kundërshtoj, do t’ju them të kundërtën.E kam konsideruar një gjë të tillë si ‘fake neës’ që në audio përgjim ishte kapur vëllai i ish-ministrit të brendshëm.
Grida Duma: Pra nuk ishte ajo?
Vangjeli: M’u rikujtuan orë debatesh. Kam qenë gjithmonë përballë Salianjit. E kam paralajmëruar që në ditën 0 që do jesh ti në atë derë. Nuk kisha fakte, por e bëra duke vënë në punë një instrument, logjikën. Logjika më thotë që kemi një akuzë, ka një komplot, që të gjithë së bashku tentonin të çonin 35 kg canabis sativa në Itali. Nuk do kishte asnjë skafist në Vlorë për aq kanabis. Kam përshtypjen që edhe zoti Fatmir Xhafaj nuk e ka hapur shampanjën e hidhur të hakmarrjes.
Grida Duma: Pra është çështje hakmarrje?
Vangjeli: Instrumenti im logjik më thotë se mes miqve të Salianjit ka shumë që duartrokasin. Unë do doja të isha avokat i Salianjit, sepse në dilemën është fajtor apo viktimë, është viktimë.
Grida Duma: Je me të se ke mëshirë?
Vangjeli: Jo, është viktimë sepse po bën burgun e tjetërkujt.
Grida Duma: Duhej bërë?
Vangjeli: Jo jo, ka një monument imoraliteti dhe tradhtie, është një histori që nuk ka filluar nga Salianji, kishte kohë që ishte në zyrat e PD, dhe për zot i doli Bardhi dhe Alibeaj. Kur e kuptuan se po shkelnin në dërrasë të kalbur doli në skenë Salianji. E lanë shokët vetëm. Kam kurajo ta them këtu, por nuk e di vetëm unë. Po i kërkohet të bëj burgun e dikujt tjetër.
Vangjeli: Zëri në audiopërgjim ishte i dobët sepse nuk u dorëzua në asnjë moment në Prokurori pajisja origjinale që ka bërë përgjimin.
Grida Duma: Nuk është e vërtetë, sepse ti e di që unë e njoh çështjen.
Vangjeli: Po është.
Grida Duma: Më dëgjo ti dhe kushdo tjetër. Do ta ngre zërin për një arsye, sepse në këtë vend etika nuk respektohet. Unë këtë çështje e njoh si lëkura ime, për shumë arsye. Mos shkoni deri aty sa të mos jem etike t’ju them me sa detaje e njoh.
Vangjeli: Nuk e vë në dyshim që e njihni.
Grida Duma: Po e njoh shumë mirë, dhe mos guxoni ta thoni, se kam qenë sekretare e marrëdhënieve me publikun në atë moment. Është dërguar nga PD aty 100 herë. Në dosjen e Prokurorisë shkruhet që ‘zëri mund të jetë i ngjashëm me Geronin dhe Fred Alizotin’, pra mundet, dhe çështja nuk është që nuk ka shkuar zëri.
Vangjeli: Pajisja origjinale thashë…
Grida Duma: Ajo pajisje që ka ardhur në PD, dhe këtu s’kam nevojë për Ervin Salianjin të ma thotë, e di unë si dëshmitar i parë me Lulzim Bashën që ka shkruar në Prokurori.