Një ditë pas njoftimit se pika kufitare e Kapshticës do të mbyllej, radhë të gjata janë krijuar nga automjete të shumta, kryesisht kamionë mëngjesin e kësaj të premte.
Shoferët e automjeteve ankohen se nuk kanë pasur asnjë informacion nëse do të mund të hynin apo dilnin ditën e sotme, pas vendimit të Greqisë për mbylljen e pikës doganore.
Ata shprehen se janë lejuar të punojnë gjithnjë dhe në çdo kohë dhe janë të habitur për këtë vendim të palës greke.
Në fakt, për shkak të pandemisë, Greqia ka mbyllur disa pika kufitare me disa shtete fqinj. Nga Shqipëria në Greqi, do të lejohet kalimi vetëm nga pika doganore e Kakavijës.
Por në fakt, shkak për vendimin të mbylljes së pikës doganore të Kapshticës, është bërë zbulimi i një skandali me tamponët fals për Covid 19.
Ditën e djeshme u raportua se tre shqiptarë ishin kapur me testin e falsifikuar të Covid-19, teksa po i drejtoheshin Greqisë.
Organet greke të sigurisë vunë alarmin, pas informacioneve të shërbimeve greke të sigurisë, se në zonën e Korçës ekzistojnë laboratorë të cilat falsifikojnë përgjigjet e testeve negative të COVID-19 PCR , që shërbejnë së bashku me formën PFL, për të hyrë në territorin grek. /e.a/noa.al