Dosja voluminoze “978″ , një pjesë e së cilës tashmë është publikuar ka futur ethet Presidentit Ilir Meta, i cili një ditë më parë sulmoi ndërkombëtarët dhe reformën në drejtësi.
Presidenti Ilir Meta, dyshohet se ka blerë dhe manipuluar zgjedhjet parlamentare të 2009. Ndërkaq, pjesë e këtij skandali janë bërë dhe organet e drejtësisë.
Fillimisht përgjimet kishin nisur ndaj biznesmenit Kastriot Ismailaj në vitin 2008. Dhe në prag të zgjedhjeve vendore dhe pikërisht dy ditë para, Ismailaj ishte kontaktuar nga Meta, i cili i kishte kërkuar para dhe plot 200 mijë euro.
Bëhet fjalë për para që do të vinin nga Afrika dhe vende të tjera për t’u pastruar në Shqipëri, dhe siç duket Ilir Meta , në atë kohë kryetar i LSI, i ka përdorur në zgjedhjet e 2009.
Sipas procesverbalit, të Departamentit të Hetimit të Krimeve në Policinë e Shtetit, që mban datën, 28.06.2009, rezulton se me datë 22.06. 2009, dy ditë para se të mbaheshin zgjedhjet vendore, Kastriot Ismailaj, ishte kontaktuar nga Ilir Meta, i cili i kishte kërkuar 200 mijë me patjetër.
“Nesër në darkë (më 23 qershor), duhet të takohemi patjetër. Më duhen 200 mijë patjetër. Mos harro”, shkruhet në SMS.
Mirëpo këto përgjime që janë në procesverbalin e Policisë, janë zhdukur nga prokurori Gentjan Osmanaj.
Të paktën një përgjim i tillë nuk rezulton në vendimin e pushimeve të hetimeve që mban datën 27.12.2010 mbi çështjen penale nr 978/2008.
Të gjithë personat me të cilat Kastriot Ismailaj ka komunikuar rezultojnë të përgjuar dhe të zbardhur në vendim, vetëm përgjimet me Ilir Metën nuk janë.
Ndaj dyshohet se prokurori Gentjan Osmani, i cili aktualisht është prokuror tek Krimet e Rënda si dhe anëtar i Këshillit të Lartë të Prokurorisë, ka asgjësuar çdo bisedë të përgjuar mes Ilir Metës dhe Kastriot Ismailajt.
Për më tepër hetimet janë pushuar pavarësisht se nga përgjimet zbardhet skema e lëvizjes së fondeve nga Afrika, Amerika apo Azia në Europë.
Ajo çfarë çudit më tepër është, fakti që edhe pas një viti përgjimesh dhe gjithë informacionit të grumbulluar prokurori ka pushuar hetimet.
CNA.al do të sjellë ditët në vijim përgjimet e zbardhura ku përfshihen botues mediash, biznesmenë dhe jo vetëm, por që për prokurorin Osmani nuk kanë qenë prova. Nëpërmjet përgjitmeve zbardhet dhe skema se si është bërë lëvizja e parave, nga kontinenti në kontinent./CNA.al