Më 28 shtator 2017, një grup kontroll i Drejtorisë së Doganave inspektuan depozitat e kompanisë Bankers Petroleum në Patos-Marinzë pas marrje së denoncimeve se kompania po u shmangej taksave duke mos deklaruar holluesit e naftës.
Dokumentet e siguruara ekskluzivisht nga Voxnews.al tregojnë se nga kontrolli rezultoi se denoncimet ishin të sakta. Kompania kishte shmangur akcizën për mijëra litra hollues. Dëmi i shkaktuar buxhetit të shtetit nga taksat e munguara ishte rreth 3 miliardë lek, ose 25 milionë euro me kursin e sotëm të këmbimit.
Drejtoria e Kontrolleve të Akcizës nisi procedurat për gjobitjen e kompanisë, sipas parashikimeve ligjore. Neni 87 i ligjit për akcizat përcakton se gjoba në të tilla raste është sa trefishi i dëmit të shkaktuar. E thënë më thjesht, gjoba që u vendos ishte 9.4 miliardë lek, ose 80 milionë euro në total me kursin e sotëm të këmbimit.
Në fillim të 2019-s, Drejtoria e Kontrolleve dhe Akcizës njofton degën doganore të Fierit për masën e gjobës, sipas parashikimeve ligjore. Por, gjoba nuk u ekzekutua as atëherë dhe nuk është ekzekutuar ende.
Bankers vendosi ta kundërshtojë gjobën nëpër gjykata. Dy nivelet e para të drejtësisë i dhanë të drejtë kompanisë. Ankimi i kompanisë u përdor si argument nga ana e qeverisë në 2019-n për të justifikuar mosarkëtimin e gjobës.
Tre vite më vonë, në prill të këtij viti, Gjykata e Lartë rrëzoi vendimet e dy gjykatave më të ulta dhe la në fuqi gjobën, e cila bashkë me kamatëvonesat dhe penalitetet e tjera që i shtohen ka shkuar në thuajse 100 mln euro.
Vendimi i Gjykatës së Lartë është heqja e çdo barriere që kishin institucionet për ekzekutimin e gjobës dhe arkëtimin e një shumë parash, aq të nevojshme për qeverinë në këtë periudhë krize çmimesh.
Por, prej shtatë muajsh institucionet kanë heshtur dhe publikisht nuk kanë bërë asnjë përpjekje për të vjelë gjobën. Burime të Voxnews.al pohojnë se vendimi i Gjykatës së Lartë ka mbërritur zyrtarisht te Drejtoria e Doganave, si palë e procesit gjyqësor. Me vendimin është njohur edhe kompania Bankers.
Megjithëse e ka të paktën prej muajit qershor në sirtare vendimin e Gjykatës së Lartë, Drejtoria e Doganave nuk ka ndërmarrë asnjë veprim për të arkëtuar gjobën. Arsye për mosreagimin nuk jepen, por korridoreve të këtij institucioni përflitet për një aferë madhore, ku ‘urdhërat’ jepen gojarisht nga lart.
Se sa lart shkon pengesa në ekzekutimin e gjobës, ndoshta një hetim i organeve të drejtësisë mund ta zbulojë. Ajo që dihet për momentin është që shqiptarëve po u kërkohet të sakrifikojnë, teksa qeveria u fal shkelësve të ligjit taksa e gjoba miliona euroshe.
(Ka dyshime të forta se kreu i Doganave Gent Gazheli është futur në pazare me mafien Bankers, për të sabotuar ekzekutimin e gjobës, duke ndarë në këmbim një pjesë të parave.
Bankers është grabitësi më i madh i pasurisë nëntokësore në historinë e Shqipërisë. Pras 17 vitesh shfrytëzon naftën dhe manipulon shpenzimet për të mos paguar taksa.
Nga ana tjetër, Gent Gazheli është një nga zyrtarët më të lakuar për korrupsion, duke iu afruar Arben Ahmetajt dhe Damian Gjiknurit. Duket e çuditshme se si Irfan Hysenbelliu ktheu në kauzë disa vartës së Gazhelit që gjoja ishin arrestuar në Greqi, por tashmë nuk flet për aferën 100 milionë euro. Arsyeja është se edhe Fania është po aq grabiqar sa edhe Gazheli. Ai e sulmoi Gazhelin pas prishjes në pazare”.