Kreu i PD, Lulzim Basha i është bashkuar protestës së banorëve të zonës së Astirit në ditën e 32 të tyre.
Basha është pyetur nga gazetarët edhe për legalizimet që janë dhënë në 2013 në Unazën e Re nga Partia Demokratike ku ai po proteston sot.
Basha iu shmang pyetjes duke vazhduar dhe akuzuar se në këtë projekt janë përfshirë hajdutë, të cilët po vjedhin.
“Këtu po harxhohen 48 milionë euro. Në këtë vjedhje janë përfshirë një grup hajdutësh. Edhe mediat e kanë faktuar. Gjithçka prej fillimit që ne kemi denoncuar është e vërtetë”, tha ndër të tjera Basha.
Një pyetje tjetër e bërë nga gazetarët ishte se: PD ishte e vendosur dhe iu premtoi banorëve se do i mbronin me trupat e tyre godinat, por diçka e tillë nuk ndodhi?!
Basha u përpëlit majtas djathtas, duke kërkuar një përgjigje të arsyeshme e duke belbëzuar pa arsye deri sa bëri fajtor median, se për këtë punë ata nuk e kishin ndihmuar aspak, madje duhet t’i kërkonin kryeprokurores pse nuk hapte hetim për çështjen në fjalë.
Kujtojmë këtu edhe fjalën e kryeministrit Rama para disa ditësh ku ai tha se si qeveria Berisha në fund të mandatit të saj në 2013 ka dhënë 40 legalizime në mënyrë korruptive tek Unaza e Re.
“40 legalizime janë biznese të legalizuara nga korriku në shtator të 2013-s. Janë bërë legalizime nga më abuzivet. Janë miliona që merren nga kontributet e buxhetit për të dëmshpërblyer jo pronarë të legalizuar normalisht, por për të dëmshpërblyer ngrehina të legalizuara në kundërshtim me ligjin”, tha Rama.