Ky është polici maqedonas që mbrëmë ( 29 nëntor 2024) hoqi flamurin shqiptar nga shtylla në Kumanovë. Fotoja e tij është bërë publike sot nga media “Tetova Sot”, ndërsa një ditë më parë u tha se ishte identifikuar me inicialet D.K..
Pas heqjes së flamurit shqiptar kanë reaguar partitë politike opozitare duke kërkuar dorëheqjen e ministrit të Brendshëm dhe dënimin e policit maqedonas. Zv.ministri i Ministrisë së Punëve të Brendshme, Astrit Iseni, tha se polici do të dënohet me masa disiplinore.
“Do të ketë një procedurë disiplinore kundër punonjësit të MPB-së që hodhi flamurin Shqiptar. Çdo punonjës i MPB-së ka detyrimin të respektojë ligjet dhe simbolet e të gjitha bashkësive etnike në Republikën e Maqedonisë së Veriut. Mosrespektimi i këtyre detyrimeve do të sanksionohet pa përjashtim”,- ka shkruar Iseni.
Në pamjet që po qarkullojnë në rrjet, dallohet momenti kur polici maqedonas heq nga shtylla një flamur shqiptar në Kumanovë. Pasi e heq, ai e hedh në tokë, një veprim që ka shkaktuar zemërim dhe indinjatë tek shqiptarët e Maqedonisë.