Banorët e Astirit që preken nga ndërtimi i “Unazës së Madhe”, kanë filluar të lirojnë banesat që do të prishen, për t’u shpërngulur në shtëpitë sociale të vëna në dispozicion nga ana e Bashkisë së Tiranës.
Sot janë shpërngulur dy familjet e para, ndërsa në ditët në vijim pritet që të shpërngulen edhe familje të tjera.
Vetë kryebashkiaku Erion Veliaj ftoi banorët që preken nga ndërtimi i “Unazës së Madhe” që të aplikojnë pranë njësive të tyre administrative për të përfituar banesa sociale.
“Në kohë rekord janë bërë gati apartamentet, janë blerë duke nisur nga frigoriferët, tek televizorët, tek çdo nevojë bazë që ka një familje.
Ajo që kam parë është që këto kushte këtu janë në fakt disa herë më të mira se sa shtëpitë që po lënë, shtëpiza pa leje, barraka pa leje, ndërkohë marrin sot një ofertë shumë më të mirë se sa ajo që lanë.
Fillimisht, kjo rezervohet për të gjithë familjet që kanë aplikuar në Bashkinë e Tiranës dhe nuk kanë asnjë dokument, ndërkohë që të tjerët do marrin shpronësimin.
Ftesa ime është, sipas njësive 6, 7 apo Kasharit, apo 11 aplikoni për banesa sociale”, tha ai.
Ndërkohë, në terren ka nisur edhe prishja e banesave të para.
Raportohet se janë prishur dy banesat e para, për t’i hapur kështu rrugë prishjes së ndërtesave të tjera dhe fillimit të punimeve për ndërtimin e “Unazës së Madhe”.
