Deputeti i Partisë Socialiste, pjesë e Komisionit parlamentar të Ekonomisë kërkoi transparencë nga Bordi që ka ngritur qeveria mbi transaksionet e importit të naftës në vendin tonë dhe importuesit.
“Mbi ç’baza ligji vepron Bordi dhe vendos çmimet? A ka mundësi të bëjë dikush nga qeveria transparencë për transaksionet? Kush e ble naftën dhe kush e sjell? Ku e sjell dhe ku e depoziton? Se përmendet një term që nuk ekziston fare në ligj ‘depozitues i regjistruar’”,-tha deputeti i PS-së.
Braçe bëri thirrje se duhet të rishikohet akti normativ mbi hidrokarburet sa më shpejt të jetë e mundur sepse nuk ka qartësi. Ai preku edhe faktin se përherë të parë, pikat e bardha të tregtimit të naftës dhe ato të brenduara kanë çmim të unifikuar të hidrokarbureve, kur më herët pikat e bardha e kishin shumë më të ulët dhe kjo tregon se nuk ka më konkurrencë.
Gjithashtu, deputeti socialist propozoi të hiqen fare nga tregu pikat e karburanteve që nuk tregtojnë as 500 litra naftë në ditë.
Më tej, deputeti i PD-së, Edmond Spaho, po ashtu pjesë e komisionit tha se në tregun e naftës në vend ka evazion nga vetë kompanitë. “Një kompani qarkullon 2 mld euro dhe derdh në arkën e shtetit vetëm 400 mln.
Në Shqipëri ka monopole dhe duhet pranuar. Në mënyrë të paturpshme ata ndikojnë në sektorët ekonomikë. Të gjitha shoqatat e krijuara për internat e tyre kanë karakter të mirëfilltë monopoli. Qeveria duhet të krijojë mekanizma për të kontrolluar monopolet”, tha ai.
Spaho ngriti pyetjen se pse një vend me 2 mln banorë si Shqipëria konsumon 600 mijë ton naftë në vit dhe një vend si Kosova me 1 mln banorë, konsumon 750 mijë ton naftë.
Ai shtoi edhe se në një situatë të tillë duhet të rriten pagat dhe jo ato minimale sepse sipas tij ato mbeten një farsë.
“Në privat merr 200 mijë lekë në dorë dhe në bordero 400 mijë lekë, çfarë fituan njerëzit?”, pyeti ai.
Drejtuesja e këtij komisioni këtë të martë, deputetja e PS, Blerina Gjylameti u shpreh së në mbledhjen e ardhshëm do të ftohet ministrja përkatëse për të dhënë përgjigje mbi këto pyetje të ngritura.
Pjesë e Komisionit ishte dhe ministrja e Financave dhe Ekonomisë, Delina Ibrahimaj e cila ripërsëriti përmbajtjen e paketës së rezistencës dhe se po përgatiten skenarë pozitivë mbi parashikimin e krizës.
Ibrahimaj tha se referuar edhe sugjerimeve nga FMN-ja, është shtyrë ndryshimi në sistemin fiskal.
“Ka profesione që nuk tatohen dhe kjo do të rregullohet. Më 20 prill do të jetë gati projektligji për tatimin mbi vlerën e shtuar. Planifikojmë edhe ndryshimin e sistemit të pagave”,- u shpreh Ibrahimaj.