Presidenti turk Rexhep Tajip Erdogan tha të enjten se do të kandidojë sërish në zgjedhjet presidenciale të planifikuara për në qershor 2023, në njoftimin e parë zyrtar.
“Unë them këtu, Tajip Erdogan është kandidati i Aleancës Popullore për president,” u tha Erdogan mbështetësve në qytetin e Izmirit në Egje, duke iu referuar aleancës elektorale me Partinë e Lëvizjes Nacionaliste (MHP).
Shumë vëzhgues besojnë se gara zgjedhore e vitit të ardhshëm do të jetë një nga zgjedhjet më kritike në historinë e fundit turke.
Një nga mediat gjermane, DPA, pëgjithësisht jodashamirëse me pushtetin aktual turk, thotë se pas gati 20 vjetësh në pushtet, Partia për Drejtësi dhe Zhvillim (AKP) e Erdoganit do të shkojë në votime mes një krize valutore në rritje, normës më të lartë të inflacionit në dy dekada dhe rritjes së papunësisë, mes problemeve të tjera.
Ndërsa opozita akuzon gjithashtu Erdoganin për rritjen e frikësimit të rivalëve të mundshëm politikë në kontekstin e zgjedhjeve të vitit 2023.
Njëherësh me shpalljen e kandidaturës, Erdogan i bëri thirrje gjithashtu kreut të CHP Kemal Kılıcdaroglu që dhe ai të shpallë ose kandidaturën e tij ose kandidaturën e dikujt nga partia.
Kohët e fundit, katër parti të tjera opozitare iu bashkuan CHP-së dhe partisë Iyi për të rënë dakord mbi një strategji për të rrëzuar atë që ata e quajnë sundimin “autoritar” të Erdoganit.
Por kjo aleancë ende nuk e ka shpallur kandidatin e saj presidencial. E gjuthë opozita turke vuan prej vitesh nga figura bindëse dhe imponuese.