Kryeministri Edi Rama ka reaguar pas komenteve dhe interpretimeve për raportin e Departamentit Amerikan të Shtetit (DASH), nga ana e medias dhe politikës në Shqipëri. “Të pamësuar të lexojnë, të paaftë të kuptojnë dhe të padëshiruar të shohin e të flasin tjetër gjë, përveç të keqes që u dëshiron syri e u nxjerr goja, rrugëhumburit e politikës e të medias e keqpërdorën edhe këtë raport si gjithçka tjetër, për të tërhequr zvarrë publikun në llumin e fjalëve të tyre”, shprehet kryeministri Rama.
Reagimi i Kryeministrit Rama ka ardhur pas përfundimit të bashkëbisedimit të ministrit në Detyrë për Europën dhe Punët e Jashtme, Gent Cakaj me gazetarët. Dy ditë më parë Shtetet e Bashkuara të Amerikës dhanë alarmin për nivelin e pastrimit të parave në Shqipëri dhe trafikun e drogës. Sipas amerikanëve, pastrimi i parave mbetet në nivele të ulëta, ndërsa kërkohet të ketë më shumë konfiskime pasurish si për të korruptuarit, ashtu dhe për bosët e krimit. Në raport bëhet me dije se situata do i ndryshojë falë SPAK dhe BKH, të cilat sipas amerikanëve, do jenë funksionale gjatë 2019.
“Shqipëria ka një treg të konsiderueshëm për mallrat kontrabandë dhe kjo lehtësohet nga kontrollet e dobëta kufitare dhe doganat. Vendi duhet të zbatojë ligjet me efektivitet dhe të zhvillojë kapacitetet e policisë e prokurorisë në luftën ndaj pastrimit të parave, krimit të organizuar dhe korrupsionit. Megjithëse ka pasur disa hetime për pastrim parash, dënimet mbeten të ulëta. Statistikat e fundit tregojnë se në vitin 2017 nga një total prej 320 procedimesh për pastrim parash dhe krime të lidhura me to, 52 të akuzuar janë çuar në gjyq dhe 35 janë dënuar.
Por gjatë vitit 2019 pritet të jetë funksionale Zyra e Prokurorisë Speciale dhe Byroja e Hetimit”, thuhet në dokument. Reformat e fundit në drejtësi, verifikimi i gjyqtarëve dhe prokurorëve për korrupsion dhe për lidhjet me krimin e organizuar si dhe krijimi i një task-force policore që synon aktivitetet e krimit të organizuar, thuhet në raport, kanë krijuar një trajektore pozitive që Shqipëria të trajtojë çështjen e pastrimit të parave dhe të krimeve financiare.
Po ashtu kritika i bëhen dhe qeverisë. Sipas raportin nuk ka qenë shumë efektive në luftën ndaj pastrimit të parave. “Qeveria e Shqipërisë nuk ka bërë progres të dukshëm në luftën ndaj pastrimit të parave dhe krimit financiar në vitin 2018. Vendi mbetet i ekspozuar ndaj pastrimit të parave, korrupsionit, rrjeteve të krimit të organizuar dhe institucioneve të dobëta ligjore dhe shtetërore.
Vendi ka një pjesë të madhe të ekonomisë me para në dorë ose informale, me të ardhura të konsiderueshme nga jashtë në formë remitancash. Krimet kryesore fitimprurëse në Shqipëri janë trafiku i drogës, evazioni fiskal dhe kontrabanda. Kontrabanda ndihmohet nga kontrollet e dobëta kufitare dhe doganat”, thuhet në raport.