Dhjetë ditë më parë, kryeministri Edi Rama, i kërkoi publikisht policisë së shtetit që të reagojë për fatin e Ervis Martinaj, një i akuzuar në Shqipëri për krime penale. Para pak javësh, një portal publikoi se Martinaj është vrarë dhe është parë trupi i tij i ndarë në 6 pjesë.
Policia e Shtetit mohoi duke deklaruar se nuk ka asgjë të vërtetë në këtë publikim.
Në kushtet kur mediat zien me këtë lajm, në daljen për media Rama e cilësoi “një ngjarje shumë të rëndë të ditëve të fundit që është përfolur shumë, si një telenovelë”, për shtetasin Ervis Martinaj që gjithsesi Rama nuk e përmendi me emër, por kritikoi faktin që Policia e Shtetit nuk kishte dalë në asnjë version përfundimtar nëse ai është vrarë apo është zhdukur. Rama lëshoi ultimatum 10 ditë më parë kur ishte goxha i nxehur me Gledis Nanon të cilit i kërkoi dorëheqjen.
Por tani, duket se Rama kërkon të mos ketë presion ndaj kryepolicit të ri, Mehmet Rrumbullaku.
Pyetjes të shtunën se kur do të reagojë policia, Rama iu përgjigj duke pohuar se kishte hequr dorë nga ultimatumi.
Megjithatë ai pranoi se gjërat për Martinajn dihen nga shteti, por mungojnë ende provat për të folur publikisht.
“Lidhur me zbardhjen e rastit me dhënien e një përgjigje përfundimtare nga ane Policisë së Shtetit. Nëse përgjigja do të ishte aty e do të ishte mbajtur e fshehur do të dilte për nëntë ditë por besoj që duhet të kemi pak më tepër durim për të marrë një përgjigje përfundimtare dhe jam shumë besimplotë që do ta kemi shpejt, sepse përgjigjja e Policisë së Shtetit duhet të mbështetet dhe në prova, nuk është thjesht një përgjigje të cilën pak a shumë e kemi që sot, por nuk mund të thuhet zyrtarisht sepse kërkon të jetë e provuar”.