Një grup shumë i vogël studentësh protestuan sërish sot para Kryeministrisë, ndërkohë që masa e gjerë e studentëve u rikthyen në mësim. Por “shuarja” e protestës solli sërish një një lajm të rremë.
Që në orët e para të mëngjesit, kur pritej një organizim masiv nga studentët siç edhe ishte paralajmëruar, në portalet pranë PD, dhe rrjete sociale, qarkulloi një foto për një njoftim ku iu kërkohej studentëve të Fakultetit të Inxhinierisë së Ndërtimit që të paguanin tarifën e plotë në masën 100% para 28-janarit.
Njoftimi i rremë i shpërndarë për studentët e inxhinierisë së Ndërtimit ku kërkohet pagesa e plotë për tarifat e studimit. Kjo shkresë, e publikuar në media dhe e botuar në mënyrë ‘misterioze’ për studentët e Inxhinierisë nuk ka as firmë dhe as vulë, elementë parësorë për vlefshmërinë e një letre zyrtare.
Burime për Shqiptarja.com nga Sekretariati i Fakultetit të Inxhinierisë së Ndërtimit bëjnë me dije se kjo shkresë nuk ka dalë nga ky fakultet, që provon edhe njëherë se njoftimi i shpërndarë është një lajm i rremë.
Në kohën kur protesta po shënon mbylljen për t’i hapur rrugë një procesi përmirësimi për arsimin në Shqipëri, në media shpërndahen të tilla lajme të rreme të botuara në mënyrë flagrante në emër të një institucioni.
Ndërkohë që kryeministri Edi Rama reagoi më vonë dhe tha se shkresa është dezinformim dhe se qeveria e ka miratuar me VKM përgjysmimin e tarifave dhe se brenda janarit, do të dorëzohen paratë tek universitetetet.
Rama përveç opozitës që e akuzon se mori peng protestën, nuk harroi të përfshinte në këtë dezinformim edhe ata që i quan “fundërrina” universitetesh./Shqiptarja.com