Grevat në Francë kanë ndërprerë shërbimet e trenave, fluturimet dhe shkollat pasi më shumë se një milion njerëz protestuan kundër reformës së qeverisë mbi moshën e daljes në pension.
Protestat u mbajtën në Paris, Marsjesë, Tuluzën, Nantën dhe Nisën, duke bllokuar shumë shërbime të transportit. Edhe kulla Eifel është prekur nga protestat duke u mbyllur kështu për vizitorët.
Ministria e Brendshme e Francës në një deklaratë për shtyp ka thënë se më shumë se një milion njerëz kanë dalë në rrugë për të protestuar, nga ku 80000 ishin vetëm në Paris.
Të ndara në grupe, demonstruesit hodhën shishe, gurë dhe fishekzjarrë ndaj policisë.
Tetë nga sindikatat më të mëdha në Francë morën pjesë në protestë kundër reformave të pensioneve të shpalosura nga qeveria e Macron-it. Sindikatat kanë bërë thirrje për një ditë tjetër aksioni më 31 janar kundër legjislacionit që do t’u kërkojë qytetarëve francezë të punojnë deri në 64 vjeç, nga 62 që janë aktualisht, për t’u kualifikuar për një pension të plotë shtetëror.
Nga ana tjetër qeveria franceze ka argumentuar se kjo reformë është e nevojshme për të trajtuar një deficit të financimit të pensioneve, por kjo ka shkaktuar zemërim te punëtorët.
Në protestë kanë marrë pjesë dhe mësuesit bashkë me punëtorët e transportit, duke kërkuar kushte më të mira pune dhe ndalimin e reformës së moshës për pension.
Nga kjo protestë mbarëkombëtare, janë ndërprerë linjat e trenave dhe disa metrove.