Kandidati i çiftit Berisha-Meta për Bashkinë e Tiranës, Belind Këlliçi, ka pranuar sot se nuk ka një diplomë të shkollës së mesme. Por për të mbrojtur këtë mungesë, ka lançuar një gënjeshtër akoma më të madhe.
“Nuk arrij ta kuptoj se çfarë ka këtu kaq të pakuptueshme. Nuk ka patur moj diplomë, s’ka patur. Ka patur vetëm Dëftesë Pjekurie”, është shprehur Këlliçi, kur u pyet se a janë të vërteta faktet që kanë dalë në media.
E pyetur nga Shqiptarja.com, drejtoresha e Institutit Harry Fultz, Brikena Baxhaku, sqaron se Bellind Kelliçi, i cili ka mbaruar vetëm 4 vitet nga 5 që parashikonte cikli shkollor, ka vërtetuar se ai nuk ka marrë kurrë Dëftesë Pjekurie.
“Nuk ka si ta kishte marrë. Ai s’ka mbaruar shkollën e mesme. Ai ka marrë nga ne vetëm vërtetim notash për 4 vitet kur ka studiuar këtu. Dëftesa Pjekurisë merret vetëm një herë në jetë, kur ke mbaruar ciklin e plotë të shkollës së mesme, që z. Këlliçi nuk e ka mbaruar. Pastaj, nëse universisteti amerikan e ka pranuar pa Dëftesë Pjekurie është çeshtje e tyre, që nuk ka lidhje me Harry Fultz”, deklaron ajo.
Në fakt Këlliçi duke pretenduar në një intervistë tek Top News, se ka marrë “Dëftesë Pjekurie”, s’ka treguar asnjë dokument të tillë. Sipas drejtoreshës Brikena Baxhaku, Këlliçi në fund të vitit të katërt ka deklaruar, që duhet te ikte jashtë shtetit:
“Janë shumë studentë që ikin pa mbaruar cicklin shkollor – shpjegon Baxhaku – dhe në këto raste ne leshojmë vërtetim notash dhe dokumenta të tjera që certifikojnë studimin deri në ditën kur ata largohen. Z. Këlliçi ka kryer 4 (katër) vite studimi të ciklit 5-vjeçar të studimeve pranë shkollës sonë, në drejtimin “Biznes”, i regjistruar me nr. Amze 457.
Gjatë këtyre viteve ai ka një vlerësim me notë mesatare 9,7. Në përfundim të klasës së 12-të, në përgjigje të kërkesës se tij për studime të mëtejshme në SHBA, ështe pajisur nga shkolla me dokumentet e mëposhtme:
a) Raportin Shkollor “School Report” me rezultatet përkatëse për 4 (katër) vite, pra vërtetim notash
b) Skelet kurrikul 2001-2005 dhe programet mësimore të detajuara për çdo lëndë
c) Vërtetim (TIP) i cili sqaron në lidhje me zhvillimin në gjuhën angleze të 70% të teksteve dhe programeve mësimore.”
Drejtoresha Baxhaku duke nenvizuar korrektësi të plotë në procedurat e respektuara nga instituti i mirënjohur që ajo drejton, sqaron se: “kjo praktikë është ndjekur në shkollën tonë për 35 nxënës të dalluar të periudhës 1997-2005, të cilët pas 12 viteve shkollimi në Shqipëri, kanë ndjekur studimet e mëtejshme në SHBA, Mbretëri e Bashkuar dhe Republikën Çeke, për motivin e pajtueshmërisë kurrikulare dhe të krediteve përkatëse. Praktika nuk ishte e rezervuar për “vipat”, por vetëm për ata që kishin vendosur të studiojnë jashtë. Praktika u ndërpre në vitin 2005, thjesht sepse nga viti 2006 filloj procedura me maturën shtetërore”.
Siç duket nga deklarata e drejtoreshës se “Harry Fultz”, Bellind Kellici nuk është pajisur kurrë me “Dëftesë Pjekurie”, siç pretendon sot ai.