Zbardhen detajet e negociatave mes Shqipërisë dhe Greqisë sa i takon kufirit detar. Takimi i qershorit mes grupit negociator ka qenë i fundit dhe palët kanë rënë dakord për pjesën më të madhe të problemeve. Një burim pranë Ministrisë së Jashtme i tha gazetës se ndarja e re kufitare është bërë sipas modelit të baraslargësisë. Në marrëveshjen e vitit 2009 Greqia përdori shkëmbin Barketa si pikë të fundit dhe kjo bëri që të fitonte territor. Por mësohet se me marrëveshjen re, ky shkëmb nuk do shërbejë si pikënisje dhe do ketë një ndarje tjetër të vijave kufitare. Një zyrtar i MEPJ u shpreh i bindur se Shqipëria do rifitojë të gjithë territorin që ju shit Greqisë nga qeveria “Berisha”. Sipas burimeve, pak kohë më parë Greqia i ka dorëzuar qeverisë shqiptare një draft me planin e propozimet e tyre. Pasi u shqyrtua ky draft, grupi negociator shqiptar i ktheu përgjigje palës greke, duke i dorëzuar po një draft, me pikat dhe konkluzionet e palës sonë. Mësohet se për një pjesë të madhe të çështjeve palët kanë rënë dakord dhe tani e vetmja gjë që ka mbetur pezull është vendimi i presidentit Meta. Pala shqiptare ka propozuar një ndarje të re kufitare ku ne fitojmë mjaft territor. Gazeta ka mësuar nga burime shumë të sigurta se Ministria e Jashtme i ka dorëzuar kreut të shtetit një numër shumë të madh dosjesh dhe dokumentesh. Pas takimit të 21 qershorit, kreut të shtetit i janë vënë në dispozicion kopjet e të gjitha çështjeve të diskutuara. I janë dhënë procesverbalet e takimeve. Po ashtu është informuar mbi hartat, mbi shelfet, modelin e ndarjes së kufirit dhe skemat e hartuar nga grupi negociator. Sipas ligjit, ministri Bushati duhet që të kërkojë autorizim nga presidenti që marrëveshja të quhet e përfunduar dhe të shkojë në Parlament. Para se të ndodhë kjo, ai ka kërkuar mendimin e kreut të shteti mbi draftin paraprak, në mënyrë që të korrigjohen çështje të caktuara. Drafti që ka në dorë Meta i është dërguar dhe Athinës, e cila paraprakisht ka rënë dakord për shumicën e çështjeve. Por tani pritet fjala e Metës.
Përplasjet Qeveri-Presidencë
Gazeta ka mësuar se përfaqësuesit e Ministrisë së Jashtme dhe të qeverisë janë irrituar jashtë mase me Presidentin Meta. Ky i fundit ka qenë shumë kritik gjatë gjithë muajve të fundit, pasi ka dërguar me dhjetra shkresa për çështjen e detit dhe ka kërkuar informacione mbi gjithçka. Por gazeta ka mësuar se Meta pritet ta bllokojë marrëveshjen dhe të kërkojë zgjatje të bisedimeve. Arsyeja nuk ka të bëjë shumë me atë se çfarë kanë konkluduar negociatorët, por me luftën që ka nisur me qeverinë. Një person shumë afër kreut të shtetit tha për gazetën se Meta pas 1 viti në krye të Presidencës ka filluar të kuptojë se emërimi në këtë post nga mazhoranca nuk ishte vlerësim, por taktikë për ta nxjerrë jashtë politike. Ai i ka “duart e lidhura” në një farë mënyre, pasi nuk mund të flasë dhe akuzojë politikisht. E vetmja gjë që ka në dorë është të bllokojë ligjet, marrëveshjet dhe ambasadorët. Madje gazeta ka mësuar se presidenti në rrethin e tij të ngushtë ka thënë se do i bllokojë qeverisë çdo lloj nisme, e cila sado pak ka çështje të diskutueshme. Dy ligje u kthyen për rishqyrtim, ndërsa pakti i detit vijon të mbetet pezull. Ajo që ka përplasur Metën me Bushatin është se negociatori i Presidentit e ka informuar atë për çdo gjë që është diskutuar, madje dhe për gjërat më banale. Në momentin që Bushati i ka dorëzuar informacionet zyrtarisht, kreu i shtetit duke qenë se ka pasur që më herët një panoramë të qartë, ka kërkuar të plotësohen të dhënat për gjithçka. Burime të sigurta i thanë gazetës se gjatë 3 muajve të fundit ka pasur një betejë shumë të ashpër letrash mes Metës dhe Bushatit. Por nëse pakti nuk zyrtarizohet shumë shpejt, integrimi vihet në rrezik pasi mbyllja e diskutimeve është kusht i Brukselit./Kliti TOPALLI