Djali i ish-diktatorit Enver Hoxha, Sokoli, në një rrëfim për emisionin “Rrugë pa rrugë”, ka zbuluar detaje mbi vilën 31, ku para viteve 1990, strehohej ai dhe familja.
Sipas Hoxhës, tuneli i shumë përfolur ishte ndërtuar në rast nevoje, nëse shtëpia bombardohej, ose binte tërmet.
Kur keni shkelur për herë të fundit në vilën 31?
Sokol Hoxha: Për herë të fundit ka qenë dita kur kam ikur dhe që atëherë nuk kam shkelur më.
Nuk do të shkosh për arsye personale?
Sokol Hoxha: Jo nuk dua më të futem. Ka qenë dita që kemi dalë pasi ra busti, një ditë më vonë. Nëse busti ishte më 20, më 21 kam ikur.
Duken planet e dronit të shtëpisë së kapur nga sipër…
Sokol Hoxha: Ne jetonim në pjesën që shikonte nga perëndimi.
Po këto oborret kanë qenë të aksesueshme, dilnit në oborret e vilës?
Sokol Hoxha: Nuk i zhfrytëzonim, ne si familjarë mund të dilnim por nuk kishim pse. As vetë babai nuk bënte shtëitje këtu, shëtitjen e bënte nga rrugët dhe gjithë aty ku janë ndërtuar ato pallatet e mëdha, që kanë qenë lulishte.
A ka pasur shtëpia një sistem strehimi? Dëgjohet shpesh të flitet për një strehim që mesa kam dëgjuar, ky sistem të lidh me ndërtesat e tjera qeveritare e të çon dikut tjetër.
Sokol Hoxha: Jo, e vetmja në kuzhinë poshtë ishte një derë që komunikonte me një korridor, pas atij korridori zmadhohej me një dhomë, kishte një telefon me sa mbaj mend, pastaj vazhdonte me një korridor dhe dilje në këtë dalje (tregon me duar daljen nga tuneli).
Pra është për sistem sigurie?
Sokol Hoxha: Po është për sistem sigurie dhe e kishin të gjitha institucionet në atë kohë, cdo ministri dhe kryeministria që përdorej vetëm nëse ndërtesa do binte nga tërmeti apo nëse kishte ndonjë bombardim, të evakuohej familja ose nënpunësit se ka qenë në çdo institucion. Por jo që këto e lidhnin me vilën e Mehmet Shehut, apo jo.
Kjo vilë sot i takon shtetit shqiptar?
Sokol Hoxha: Po, por edhe atëherë e shtetit ishte. Me sa di unë babai me Nexhmien nuk na i kanë përmendur asnjëherë por unë e di nga njerëz që kishin lidhje pas luftës, një jurist që ka qenë me lëvizjen i propozoi babait për shtëpinë e vjetër a ta kthejmë në emrin tënd? Sepse ajo ka qenë e një investitori italian që merrej me shkrirjen e pllakave të pusetave e der më vonë kanë qenë të shkruajtura. Ai kishte ardhur në kohën e fashizmit dhe pasi iku Italia edhe ai iku, e nuk është kërkuar më. Babait i propozuan që atëherë a ta kthejmë në emrin tonë, jo tha ajo është shtëpi e shtetit dhe neve na e përmendte gjithmonë që ishte shtëpi e shtetit. Nuk e kam ndjerë asnjëherë kur ika që lashë dicka nga prona ime.
Kur jeni zhvendosur në vilën 31?
Sokol Hoxha: Në shtëpinë e re jemi vendosur në vitin ’74, kur u martova.
Sa kohë zgjati ndërtimi i vilës?
Sokol Hoxha: Dy vite e gjysmë.
Kur hyra në shtëpi, më dha një simpati për stilin e kohës vura re që shtëpia ishte e ndarë me disa sisteme fizarmonike.
Sokol Hoxha: Kjo është bërë për të krijuar ambiente të gjera për evente të ndryshme. Do gjesh fizarmonikë nga dhoma e madhe që përdorej për evente për ditëlindje kur vinin njerëz nga populli apo Byroja Politike dhe dhoma e bukës me dhomën e ndenjes, kishte sistem fizarmonikë.
Për vilën 31, Sokol Hoxha thotë që të përdoret për qëllimet që është duke u përdorur aktualisht, pra për takime të veçanta politike.
“Kjo varet nga zgjuarsia që do të ketë qeveria shqiptare. Për mendimin tim, angazhimi që i ka dhënë qeveria sot, për pritje, takime, është e përshtatshme. Mënyra që kanë përdorur mënyra se si e kanë përdorur deri tani është e përshtatshme. Ajo mënyrë që është zgjedhur mua më pëlqen. Pishina që është në katin e parë është ndërtuar për ta përdorur babai. Por ai nuk e pëlqente, nuk e përdori asnjëherë”, tha Hoxha.