Nga Flogert Muça
Shqipëria është sot në një fazë të veçanë sa i përket fushës së drejtësisë, rendit dhe luftës kundër krimit dhe zgjidhjes së çështjeve të mbartura prej shtatë dekash me fqinjin jugor, Greqinë.
Sa i përket fushës së parë, asaj të sundimit të ligjit, ka një përgëzim të përsëritur dhe një mbështetje absolute nga partnerët tanë ndërkombëtarë për atë që po bëhet me Vettingun dhe për punën e kryeprokurores së re të përkohshme në bashkëpunmim me policinë. Në këtë pikë, PD dhe LSI janë hapur kundër SHBA e BE, duke e tregur këtë qasje me mosvotimin e listave të KLP e KLD. Përpos kësaj, në fushën e drejtësisë Shqipëria është kampionia e Ballkanit sa i përket reformës për sa kohë vende si Mali i zi apo Serbia akoma nuk e kanë nisur.
Në fushën e luftës ndaj krimit, në bashkëpunim me drejtësinë e re që po ngrihet, policia po ndërmerr ndryshime të fortë strukturore dhe spastrime brenda vetes për të qenë sa më profesionale dhe e paprekur nga fenomenet që dëmtojnë misionin e saj. Operacioni “Forca e Ligjit” ka çuar prapa hekurave disa grupe kriminale dhe Vettingu brenda policisë ka marrë mbështetjen e plotë të SHBA/BE. Madje ditën e sotme Prokurori kombëtar i Antimafias dhe Antiterrorizëm, Federico Cafiero De Raho u prit nga prokurorja e përgjithshme zonja Arta Marku dhe ministri i brendshëm, Fatmir Xhafaj. Ai u shpreh se “Vettingu në polici i domosdoshëm, bashkëpunimi me Shqipërinë i shkëlqyer”.
Ndërsa sa i përket zgjidhjes së çështjeve me Greqinë, për herë të parë siç saktësojnë edhe ekspertët e fushës e jo domosdoshmërisht politikanët, kemi një frymë të re ku palët janë të barabarta në tavolinën e negociimit dhe e drejta ndërkombëtare pritet të zbatohet në mënyrë korrekte për detin duke bërë fitimtare Shqipërinë dhe Greqinë.
Të trija fushat e mësipërme janë esenciale për rrugën e Shqipërisë drejt BE-së. Që nga sundimi i ligjit e deri tek shuarja e mosmarrveshjeve me fqinjët, janë shtylla që ndërtojnë rrugën drejt Bashkimit Europian.
Mirëpo, që të treja këto shtylla kanë marrë dhe po marrin goditje të vazhdueshme nga opozita. Pas sulmit frontal ndaj kryeprokurores Marku dhe pas goditjes së pandalshme që i bëhet çdo ditë me baltë policisë së Shtetit, opozita së fundmi është përveshur dhe po godet negociatat me Greqinë.
Ka një ndryshim opozitë-bërja në çëshjen e negociatave me Greqinë dhe ai është futja në lojë si kapitenë skuadre të Berishës dhe Metës.
Të dy “ujqërit” e vjetër janë në një mendje dhe secili me mënyrat dhe mjetet e tij, po sulmojnë për të njëjtin qëllim. Berisha dhe Meta duken sikur janë zhgënjyer nga Basha e Kryemadhi pasi këta të fundit nuk kanë arritur të fitojnë asnjë betejë politikë, ndaj këtë herë kanë hyrë vetë si prijës të valles së nacionalizmit.
Është ironike se si Berisha, i rrëzuar nga Gjykata Kushtetuese për marrëveshjen e detit me Greqinë dhe i mbajtur nga Meta në këmbë asokohe në bashkëqeverisje, sot bën moral pse po zbatohet vendimi i Gjykatës Kushtetuese. Në fakt, në aspektin politik as Berisha as Meta nuk kanë faj. Sepse, nëse do të finalizohet zgjidhja e çështjeve të mbartura prej 70 vitesh mes Shqipërisë dhe Greqisë, për kryeministrin Shqipërinë do të ishte një plus i madh, ose thënë ndryshe, për opozitën do të ishte një tjetër humbje e madhe. Por ajo që ka rëndësi, është fakti që në fund fituese del Shqipëria përtej çdo partie, duke bërë një tjetër hap drejtë BE-së.
Pikërisht për kët arsye, Berisha dhe Meta edhe njëherë janë bërë publikisht bashkë, i pari me gjuhën e tij të rëndë të nacionalizmit e tjetri me gjuhën nacionaliste më të rafinuar për shkak të pozicionit që mban, për të mos lejuar negociata dhe zgjidhjen përfundimtare. Ajo që bie në sy në të gjithë këtë parodi opozitare është mosbesimi i Berishës te Basha dhe i Metës të bashkëshortja e tij. Të dy e kanë kuptuar që ata që kanë vënë në krye të partive respektive nuk janë të zotët të bllokojnë aq sa duhet megjithëse përpiqen maksimalisht. Ndaj, këtë herë kanë dalë vetë për gjueti.
Historitë më spiunë që tregonte Berisha sot dhe kërkesat e Metës për të qenë pjesë e tryezës së nëgociatave, duken si klithmat e fundit të një historie që po mbyllet me fund të mirë për Shqipërinë dhe e kundërta për opozitën.
Të paktën, me Berishën dhe Metën si shefa opozite, kjo e fundit ngjan më e fortë.