Të gjithë pensionistët në vend do të përfitojnë shpërblim në fund të vitit. Qeveria në buxhetin e ri ka planifikuar një fond prej 3.5 miliardë lekë që do të shkojnë për të moshuarit me rastin e festave të fundvitit.
Por nga të dhënat e gazetës bëhet me dije se shuma që do të shkojë për çdo pensionist do të jetë e njëjtë me atë të viteve të shkuara. Për të gjitha kategoritë do të ketë 5 mijë lekë të rinj ose 50 mijë lekë të vjetra bonus. Buxheti i vënë në dispozicion për këtë lëvizje është i njëjtë edhe me atë të një viti më parë dhe nëse pjesëtohet me numrin e pensionistëve në vend shkohet te 5 mijë lekë shpërblim.
å
“Niveli i shpenzimeve për Skemën e Sigurimeve Shoqërore për vitin 2022, parashikohet në masën 148.9 miliardë lekë ose 8% e PBB. Nga ky fond, për indeksimin e pensioneve është parashikuar niveli prej 2.6 miliardë lekë dhe 3.5 miliardë lekë për bonusin e fundvitit për pensionistët”, thuhet në buxhetin e ri. Ndërkohë në buxhet është planifikuar rritje e pensionit, ose më saktë indeksim me 2.5 për qind. Kjo rritje nis në prill të vitit që vjen dhe është pak më e ulët sesa ajo që ka ndodhur deri më tani.
Një vit më parë indeksimi ka qenë 2.8 për qind. Megjithatë, sipas të dhënave në buxhet, përfitues do të jetë po të njëjtat kategori që kanë qenë dhe një vit më parë.
Kategoritë që përfitojnë rritje pensioni
Në këtë mënyrë, do të ketë rritje pensioni me 2.5 për qind për të gjithë personat që kanë marrë pension sipas ligjit nr.4171, datë 13.9.1966. Po ashtu në të njëjtën masë do të ketë rritje për pensionistë që kanë dalë në pension sipas ligjit nr.4976, datë 29.6.1972, “Për pensionet e anëtarëve të kooperativave bujqësore në Republikën Popullore të Shqipërisë”, të ndryshuar, dhe nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar.
Një tjetër kategori që do të përfitojë janë invalidët e luftës që u përballën me pushtuesit nazifashistë. Po ashtu në masën 2.8 për qind do ketë rritje pensioni për personat që kanë përfituar pension në bazë të dekretit të presidentit më 1994, të cilët gëzojnë statusin e veçantë të ushtarakut. Po ashtu do ketë shtesë për personat që kanë shtyrë daljen në pension dhe për personat që përfitojnë pension kujdestarie apo kur kanë fëmijë në ngarkim. Do të ketë rritje dhe për pensionet e caktuara dhe të rillogaritura me ligjin nr.10142, datë 15.5.2009, për sigurimin shoqëror suplementar të ushtarakëve të Forcave të Armatosura, të punonjësve të Policisë së Shtetit, të Gardës së Republikës, të Shërbimit Informativ të Shtetit, të Policisë së Burgjeve, etj.
Sa i takon kategorisë së ushtarakëve do të ketë përfitime për personat që kanë shërbyer si pilotë dhe ata që janë pjesë e sektorit detar.
Minatorët dhe akademikët
Rritje të pensionit do të përfitojnë dhe personat përfitojnë trajtimeve të veçanta financiare të për shkak se kanë punuar në miniera në nëntokë, të caktuara sipas ligjit nr.8685, datë 9.11.2000, “Për një trajtim të veçantë të punonjësve që kanë punuar në miniera në nëntokë”, të ndryshuar,
Indeksim do të ketë dhe të pensioneve të pleqërisë të punonjësve të minierave në nëntokë, të caktuara me ligjin nr.150/2014, “Për pensionet e punonjësve që kanë punuar në miniera në nëntokë”. Nuk mbeten pas dhe ata që marrin trajtime të veçanta financiare të caktuara sipas ligjit nr.9179, datë 29.1.2004, “Për një trajtim të veçantë të punonjësve që kanë punuar në disa ndërmarrje të industrisë ushtarake”. Rritje do të ketë dhe për pensionet suplementare të të punonjësve të universiteteve, të shkollave të larta, Qendrës së Studimeve Albanologjike, Akademisë së Shkencave dhe të gjitha institucioneve të tjera kërkimore publike në Republikën e Shqipërisë, të cilët kanë tituj shkencorë.