Në muajin gusht të këtij viti është raportuar se për vitin 2022 në Britaninë e Madhe kanë mbërritur në mënyrë ilegale mbi 12.000 shqiptarë.
Deputeti britanik James Dalye përmes një deklarate në rrjetet sociale ka shkruar për emigrantët shqiptarë që hyjnë në Britani të Madhe, duke thënë se: “Deri më tani këtë vit 12,000 shqiptarë kanë kaluar ilegalisht Kanalin me varka të vogla, 10,000 prej tyre janë meshkuj të rritur beqarë. Nuk ka asnjë arsye që ata të jenë këtu dhe ne duhet të ndjekim rrugën e vendeve të tjera evropiane dhe të sigurohemi që ata të kthehen menjëherë në Shqipëri”.
Komentit racist të deputetit britanik, i është përgjigjur Princ Leka II, duke kërkuar që shqiptarët të mos demonizohen për përfitime të brendshme politike në Britani.
Reagimi i plotë:
Shpifja disproporcionale është thjesht ksenofobike. Mbretëria e bashkuar ka një popullsi prej 67 milionë banorësh, me 6 milionë emigrantë. 12 mijë shqiptarë nuk është një pushtim. Dështimet e zbatimit të ligjit britanik nuk janë përgjegjësia jonë. Një numër i madh i shqiptarëve që vijnë në janë nga BE dhe jo nga Shqipëria. Mos na demonizoni për përfitimet tuaja të brendshme politike!
Ndërkohë sekretarja e Brendshme britanike, Suella Braverman po ashtu ka reaguar ashpër ndaj azilkërkuesve. Braverman u shpreh se ajo do ta zgjidhë “pushtimin” e emigrantëve me politika të reja dhe të ashpra. Gazetarja britanike e GB News, Sophie Corcoran ka cilësuar emigrimin e shqiptarëve si “pushtim”. Por edhe ky status nuk është lënë të kalohet nga Princi Leka i cili i është kthyer gazetares se mbërritja e shqiptarëve në Britani është një “përmirësim i shoqërisë”.
Kujtojmë se ish sekretarja e Brendshme britanike, Priti Patel më herët u përpoq që të lidhte një marrëveshje me qeverinë shqiptare në mënyrë që shqiptarët që shkonin në Britani do të ktheheshin sërish në vendin e tyre, por në muajin shtator u konfirmua se ky program nuk do të vihej në zbatim për shqiptarët që tashmë kishin aplikuar për azil.
Tashmë qeveria britanike është duke punuar për një marrëveshje të re me Shqipërinë për të frenuar emigrimin e shqiptarëve në Britani.