Autoritetet amerikane kanë nisur akuza penale kundër dy ish-zyrtarëve bankarë të bankës investuese Goldman Sachs, Tim Leissner dhe Roger Ng dhe financierit nga Malajzia, Jho Low.
Paditë e Departamentit amerikan të Drejtësisë rrjedhin nga skandali i madh në Fondin Shtetëror për Zhvillim, i njohur me shkurtesën 1MDB.
Njëri ish-zyrtar i Bankës Goldman ka pranuar komplotin me pastrim parash dhe shkelje të ligjit kundër ryshfetit.
Derisa zyrtari tjetër bankar është arrestuar, Low mbetet në arrati.
Këto njëherësh janë akuzat e para penale të Shteteve të Bashkuara që kanë dalë në pah prej ndodhjes së skandalit, për të cilin autoritetet kanë thënë se zyrtarët publikë kanë vjedhur miliarda dollarë nga shteti për të blerë vepra arti dhe gjëra tjera.
Pretendimet për korrupsion kanë pasur rol të madh në humbjen e procesit zgjedhor të Najib Razak, i cili ka qenë më parë kryeministër i Malajzisë.
Ai ka qenë i ngarkuar me akuza për korrupsion në Malajzi, derisa ka garuar, ndonëse ka mohuar vazhdimisht të gjitha supozimet.
Autoritetet amerikane kanë nisur edhe padi civile me qëllim të rikthimit të gjërave materiale të blera me paratë që pretendohet se janë vjedhur.
Në këtë rast, prokurorët kanë thënë se ish-zyrtarët bankarë Tim Leissner dhe Roger Ng kanë punuar me Low për t’iu dhënë ryshfet zyrtarëve qeveritarë.
Ata kanë punuar në ngritjen e fondeve në 6.5 miliardë dollarë, mirëpo ndonëse këto projekte kanë pasur synim projektet zhvillimore, të tre burrat kanë shfrytëzuar 2.7 miliardë dollarë për ryshfet, kanë thënë prokurorët.
Low, i cili është akuzuar më parë në Malajzi ka mohuar vazhdimisht pafajësinë e tij, duke i cilësuar këto akuza politike.
Ndërkohë, Tim Leissner, i cili ka pranuar fajësinë, është ndëshkuar me 43.7 milionë dollarë.
Kompania, Goldman Sachs, e cila ka fituar 600 milionë dollarë në pagesa që rrjedhin si rezultat i bashkëpunimit me 1MDB, ka mohuar çdo keqbërje dhe ka thënë se është duke bashkëpunuar në këto hetime./REL