Nga Anri Bala
Vërtet është skandaloze dhe e turpshme, kur shikon Presidentin e Republikës, që përshëndet në eter askënd dhe askund, me katër gishta lartë. Është e turpshme dhe fyese, që një përfaqësues i unitetit kombëtar, të sillet si dallkauk flamujsh dhe simbolesh. Nuk besoj, se do të harrohet lehtë për bëmat e tij qesharake, për shumë njerëz që e kanë parë dhe e kanë sharë, e atij as që i kanë bërë përshtypje… nga mungesa e inteligjencës, ndaj vazhdon të qesh e gëzoi dhe sillet si më parë… idioti i lumtur.
Askujt nuk ia merrte mendja, se Presidenca do të kthehej në një strofull, ku gëlon injoranca dhe mediokriteti. Teksa presidenti i tyre, sepse i imi nuk ka për të qenë kurrë, dilte dhe protestonte si militant faqezi për hallin e tij, injoranca brenda Kullës së Barit presidencë, e kishte armatosur dhe me flamurin amerikan, a thua se kishte dal aty në emër të Amerikës dhe me urdhërin e Amerikës.
U desh, ndërhyrja e ambasadores amerikane Juri Kim, që dallkaukut të flamujve dhe simboleve t’i tregohej kufiri dhe t’i çirrej maska mashtruese, teksa hiqej si mbrojtësi i demokracisë, por në fakt ishte bombarduesi i përditshëm i atdheut të demokracisë dhe shkelësi i pafytyrë i lirisë demokratike, që fatkeqësisht ia dha me dashje e majta, duke e vendosur në mënyrë turpëruese në postin e presidentit.
Duke treguar një verbëri të paimagjinueshme, e majta nuk mund të justifikohet kurrë për këtë barrë të rëndë, turpi që i la për 5 vjet Shqipërisë dhe shqiptarëve. Askujt mos t’i shkoi në mend, se demokratët dhe socialistët, qytetarët e thjeshtë, prisnin që në krye të shtetit të vendosej një njeri si Ilir Meta… sepse të majtët nuk e kishin harruar ende “bllokun e kuq”, që prodhoi një masakër në mes të Bulevardit… kurse të djathtët tradhëtinë në fundin e pushtetit të përgjakshëm, për të cilin i morën jetën katër qytetarëve të pafajshëm, e gjithë kjo pasi ua mori dhe gllabëroi çfarë deshi, deri dhe faljen për atë që s’falej, grabitje milionash në zyrën e shtetit, a thua se ishte një cigan që bënë pazar me mushkat e veta.
Por, më fyese dhe poshtëruese është pjesa e dytë, e prodhuar nga gabimi i rëndë i së parës. Për të majtët, ai tashmë e ka kthyer Presidencën në një gjiriz, ku mund të hidhen letra higjenike, të cilat ai i mbledh, natyrisht me pastrues gjuhëfshesë dhe u’a hedh andej nga kanë ardhur… te dera e Parlamentit.
Kurse të djathtët, po i miklon dhe i mashtron, për t’i bindur se ai është me ata, madje jo një herë, por… dy herë. Simboli i vjedhur i PD-së ekzistonte deri dje, por sot ka pësuar mutacion, e tashmë nuk kuptohet çfarë është. Simbolin e tij të ri me katër gishta e dy duar, një dorë si demokrat për të joshur Berishën dhe një dorë si LSI-st lugat, për të trembur Bashën çdo ditë e më shumë, po u’a nxjerr sytë demokratëve të vërtetë.
Ëndrra e shkarkimit dhe e largimit, që përfundoi në një këshillimore edukatorësh, e bëri edhe më të rëndë gjendjen në Presidencë. Krekosja si fitimtar, ndaj atyre që i dhanë vulën në dorë, kur duhet t’ia jepnin në ballë, tregoi edhe një herë, se sa e vobekët dhe imorale është politika jonë, tamam si një prostitutë jetime, që nuk ikën kurrë nga bordello.
Nuk ka asnjë justifikim përulja duke shkelur ligjin dhe anashkaluar me shurdhëri zërin e mijëra qytetarëve, që kërkojnë drejtësi. Nuk ka asnjë justifikim, që institucionet ligjzbatuese të këtij vendi të flejnë gjumë, sepse partia në pushtet, si moraliste e dalluar, nuk mbron ligjin dhe shtetarët e saj, në emër të postulatit socialist: S’jemi si ata, kur ata nuk janë si ne!
Përrallat me drejtësinë e re janë utopike, sepse drejtësia nuk ka moshë dhe ky është një borxh i madh i pashlyer i Ramës ndaj qytetarëve shqiptarë, që nuk duhet të harroi shprehjen: Më mirë djepin bosh, se shejtanin brenda! Veçse, na ka dal një problem teknik… nuk po merret vesh se kush është shejtani!/Ekskluzive.al