Thellohen përplasjet mes kreut të Partisë Demokratike, Lulzim Basha dhe presidentit Ilir Meta. Ditët e fundit kreu i shtetit ka shfaqur hapur simpatinë e tij për ish-kryeministrin Sali Berisha, i cili ka zbritur në bazë kundër kryedemokratit Basha, ndërsa ka dhënë sinjale se dëshiron të marrë frenat e opozitës.
Për rrjedhojë këto lëvizje kanë alarmuar demokratët, të cilët nga qendra deri në bazë janë mobilizuar për t’u bërë digë kundër dyshes Meta-Berisha. Gazeta gjatë këtyre ditëve ka publikuar disa udhëzime që iu janë dërguar krerëve të degëve, ndërkohë që sot po sjell për lexuesin një tjetër qarkore, ku udhëzohet baza demokrate që në takimet me anëtarësinë dhe simpatizantët demokratë të bëhet e qartë se nuk do lejohet presidenti Meta të marrë frenat e opozitës.
Më konkretisht në qarkoren, e cila ka qenë pjesë e diskutimit në disa nga mbledhjet e zhvilluara së fundmi në degë të ndryshme të vendit, ku të pranishëm kanë qenë edhe deputetë të PD, thuhet se kreu i shtetit po tenton të përçajë demokratë dhe ka shpresë se me ndihmën e ish-kryeministrit Berisha do të katapultohet në krye të opozitës. Por më tej në dokument që është ndarë me anëtarësinë, bëhet e qartë se ky skenarë që Meta të marrë frenat e Partisë Demokratike dhe opozitës në tërësi nuk do të lejohet të ndodhë.
“Lëvizja Socialiste për Integrim luan lojën e dobët dhe të dëshpëruar, lojën në tentative, për të rrezuar kryetarin e ligjshëm të Partisë Demokratike me shpresën se një kryetar i ri i kësaj partie do t’ia zgjasë dorën e do ta marrë me vete, apo në rastin më të keq Sali Berisha të emërojë Ilir Metën atje. Por kjo nuk ka për të ndodhur. As kryetari i Partisë Demokratike nuk rrëzohet dhe as dora Ilir Metës nuk do i zgjatet”, thuhet në dokument.
Meta po mbështet “Foltoren” e Berishës
Më tej në qarkore që tashmë iu është vënë në dispozicione degëve të PD, hidhen edhe akuza në adresë të Lëvizjes Socialiste për Integrim dhe presidentit Ilir Meta, se po mbështesin foltoren e ish-kryeministrit Sali Berisha. Sipas asaj që thuhet në dokument, njerëz të LSI dhe besnikë të Metës kanë dalë hapur krah aksionit të ish-kryeministrit Berisha, madje edhe duke i mbushur atij sallën me simpatizantë gjatë takimeve që ka zhvilluar me bazën demokrate, pas përjashtimit të tij nga grupi parlamentar i Partisë Demokratike.
“Ka disa javë që njerëzit e Ilir Metës kërkojnë dorëheqjen e Lulzim Bashës dhe po të mos i njohësh të duket sikur këta janë themelues të Partisë Demokratike. Turfullojnë në rrjete sociale, marrin pjesë në Foltoren e Berishës, provokojnë debate të kota a thua se këta janë kontribuesit dhe dashuruesit më të mëdhenj të kësaj partie dhe tani iu dhimbset kjo parti. Kjo ndodh për shkak se Lulzim Basha nuk e ka ndërmend të këtë më, të paktën se afërmi, ndonjë koalicion me partinë LSI dhe me Ilir Metën. Kjo parti, e cila ishte mësuar me pushtet, tani duke parë se asnjëra nga partitë e mëdha nuk ia jep më dorën, ndoshta ndjen se nuk ka më asnjë mundësi për të marrë më pushtet dhe për ta forcuar veten përmes qenies në pushtet”, thuhet në qarkoren që u ka shkuar në tryezë degëve të PD.