Ndjesë familjarëve të gjyqtares së ndjerë, por deri në këtë degradim, kanë përfunduar strukturat e “Veting”-ut dhe Ministria e Drejtësës, KED, KLGJ, e KLP, të cilat quhen drejtësi e re sa për dekor, sepse faktikisht, komandohen e përbëhen nga kalbësirat e drejtësisë së vjetër, aq sa “ngjallin” dhe të vdekurit për t’i verifikuar, ndërkohë që të gjallët e kriminalizuar të llojit Gjoni, Fusha, Kalaja e Dollani, kanë frikë t’i fusin dhe në lista, për shkak të lidhjeve të pista me politikën dhe pazaret që kanë bërë së bashku si kolegë, në 28 vite gjykata e prokurori “tregje”
Është skandal e turp, por është fakt shkresor, që Komisioni i Përhershëm i Kualifikimit (KPK), në bashkëveprim më Këshillin e Lartë Gjyqësor (KLGJ), me Këshillin e Emërimeve në Drejtësi (KED) por edhe me Ministrinë e Drejtësisë, kanë futur në listën e “Veting”-ut, edhe gjyqtaren Fildeze Hafizi, të ndarë nga jeta, 9 muaj para se të niste ky proces dhe 1 vit pas fillimit të tij.
Kujtojmë që Fildeze Hafizi, sot mbush 2 vjet që nuk jeton më, por kolegët e vjetër të punës që jetojnë dhe komandojnë drejtësinë e re, kanë njoftuar zyrtarisht e publikisht gjyqtaren e ndjerë, se në kuadër të reformës në drejtësi, është futur në listën e shortit për “Veting” dhe në datën e caktuar, duhet të dalë nga varri e të paraqitet para KPK dhe OMN..
Pa bërë komente, po faktojmë këtë çmenduri të drejtuesve të KPK, Ministrisë së Drejtësisë dhe institucioneve të tjera të drejtësisë, që po merren me “Veting”-un, të cilët vazhdojnë e mbajnë në listat e organikës së gjykatës, kur 2 vite më parë, me lotë në sy e kurora në duar, kanë marrë pjesë në ceremoninë mortore, të koleges së vrarë nga bashkëshorti.
KLP e KLGJ, planifikojnë e njoftojnë për “Veting”, gjyqtaren që është vrarë në datën 31 gusht 2017, kur vetë procesi i ngritjes së KPK, ka nisur në datën 5 janar 2018, ndërkohë që Operacioni Ndërkombëtar i Monitorimit (ONM), ka ardhur në Shqipëri në datën 7 shkurt 2018, për të ndjekur krijimin e zgjedhjen e anëtarëve të KPK, ndërsa procesi i “Veting”-ut ka nisur në datën 15 prill 2018, me listën e parë prej 57 gjyqtarësh e prokurorësh, të futur në hetim nga DSIK e ILDKP, në datën 20 janar 2018.
Mirëpo, në muajin prill 2019, afro 20 muaj pasi Fildeze Hafizi nuk jeton më, shefat e KPK, KLGJ dhe ministrja Etilda Gjonaj, që prej 1 viti nuk po “gjejnë dot” Gjin Gjonin, e paskan “ringjallur” dhe e kanë futur në listat e “Veting”-ut, me numër rendor 178, për verfikim gjatë sezonit shtator-dhjetor 2019.
Nuk e dimë, nëse gjyqtarja e ndjerë, do të paraqitet apo jo para KPK e ONM, por me qyfyret dhe poshtërsitë nga reforma në (pa)drejtësi, nuk është çudi, të dëgjojmë lajmin, se siç bënë Fildezin të gjallë, mund të shpallin të vdekur Gjin Gjonin, për ta shpëtuar nga “Veting”-u./Pamfleti