Të gjithë shpresonim se Covid-19 mund të mos i rezistojë nxehtësisë së verës, por duket se këto shpresa janë zbehur, pasi virusi u ringjall mes temperaturave të larta.
Por çfarë do të ndodhë me Covid-19, kur koha të nisë të ftohet dhe vërdallë të jenë edhe gripi edhe virozat e tjera të vjeshtës?
“Ne mund të kemi një valë të Covid-19 në vjeshtë,” thotë virologu Ab Osterhaus nga Qendra e Kërkimit për Infeksione të Reja në Hanover.
Deri atëherë, ai shpreson, se ne mund të jemi më mirë në trajtimin e rasteve të rënda dhe më shumë vende mund të jenë në gjendje të provojnë, gjurmojnë dhe izolojnë të gjitha rastet dhe kontaktet e tyre, e të përmbajnë virusin, më shumë se sa tani.
Shqetësimi më i madh është se spitalet do të jenë në një luftë të madhe, pasi do të duhet të luftojnë edhe me sezonin e gripit. Këtë vit ata do të duhet të përballen edhe me Covid-19, i cili nuk tregon asnjë shenjë të ikjes dhe madje mund të rritet nëse rezulton se temperaturat e ftohta, ose qarkullimi i viruseve të tjerë të vjeshtës dhe dimrit, rrisin përhapjen e tij.
“Problemi i parë do të nisë me përcaktimin se cilin virus ka një pacient. Gripi, Covid-19 dhe sëmundjet e tjera të frymëmarrjes sezonale janë praktikisht të padallueshme në bazë të simptomave,”shpjegon epidemiologja Barbara Rath nga universiteti i Nottingham.
Ekspertja tregon se ne kemi nevojë për teste më të mira diagnostikuese, personeli mjekësor ka nevojë për veshje të plotë mbrojtëse për të menaxhuar një pacient Covid, më tej ajo shton se duhet realizuar edhe vaksinimi me vaksinën e gripit të të gjithë personelit shëndetësor.
E panjohura është ajo që bën Covid-19 të veçantë nga viruset e tjerë. Në vjeshtë ka një seri të parashikueshme të shpërthimit të viruseve të frymëmarrjes. Fillon me rinovirusin, shkaktarin kryesor të ftohjes së zakonshme, e cila shpërthen çdo shtator ndërsa fëmijët e vegjël shkojnë në shkollë.
Rinovirusi bie pasi shumica e fëmijëve janë të ekspozuar dhe aktivizohen sistemet e tyre imune. Pastaj shpërthen një virus tjetër që quhet virusi sinkytial i frymëmarrjes, ose RSV. Çdo vit në Tetor ose Nëntor, kjo shkakton ftohje të butë te njerëzit e të gjitha moshave, por ndonjëherë kalon në infeksione të rënda të mushkërive tek të rinjtë.
RSV është aq e zakonshme sa që pothuajse e kanë kaluar edhe fëmijët dy vjeç. Kjo sfilatë e parashikueshme e infeksioneve, ka gjasa të ndodhë në një kohë kur sistemi shendetësor është në vështirësi.
“Tani shtrohet pyetja se ku do të përshtatet Covid-19 në mes të këtij ngacmimi viral. Jo çdo virus mund të qëndrojë më vete.Ndonjëherë mund të infektoheni nga dy menjëherë. Pra, çdo të ndodhë me Covid-19?,” thotë Ian MacKay nga universiteti i Queensland.
Mjekët në Spitalin Tongji në Wuhan raportojnë se në janar dhe shkurt të këtij viti, pasi Covid-19 u zbulua në qytet ndërsa gripi qarkullonte akoma, shumë pacientë të infektuar nga Covid-19 kishin të dy viruset. Infeksioni i dyfishtë nuk dukej të ndryshojë shanset e tyre për të mbijetuar në krahasim me njerëzit vetëm me Covid-19, por ata kishin pësuar dëmtime në zemër, inflamacion të organeve, reagim të më vonshëm të sistemit imunitar e disa gjendje të tjera.
Sipas ekspertve nëse ka ndërhyrje të konsiderueshme për t parandaluar një valë të dytë më të vështirë, epidemitë e vjeshtës mund të mos ngatërrohen me Covid-19.
“Ne duhet të shpresojmë për më të mirën, por të përgatitemi për më të keqen,” thotë Osterhaus. Kjo në thelb do të thotë të përgatitet për grip, sepse është i vetmi nga këto viruse për të cilët kemi një ilaç specifik antiviral dhe një vaksinë, pavarësisht viteve të përpjekjeve intensive për të zhvilluar një vaksinë për RSV.
Edhe pse viruset e gripit evoluojnë vazhdimisht, një vaksinë për virusin e gripit është diçka që duhet të marrësh çdo vit. Çdo shkurt virologët përpiqen të parashikojnë se cilat viruse do të qarkullojnë gjatë dimrit në vazhdim.
Atëherë ata që duan të shmangin gripin vaksinohen në vjeshtë pak para se të godasë virusi.
Skenari i makthit do të ishte nëse gripi i këtij viti nuk do të ishte lloji normal sezonal, i lidhur ngushtë me gripin që pamë vitin e kaluar dhe një vit më parë, për të cilin të gjithë kemi imunitet. Ekspertët shpresojnë që kjo mos të ndodhë pasi jo vetëm që vaksina e gripit që po krijojmë tani nuk do të funksionojë kundër tij, por edhe një e re nuk mund të bëhet në më pak se gjashtë muaj.
Perspektiva e goditjes së një pandemie gripi mes një pandemie ekzistuese Covid-19 është e diçka e vështirë. Shkalla e vdekjeve mund të jetë e lartë dhe spitalet kudo nuk do e përballonin dot.
Eksperytët thonë se mënyra e vetme për të bërë vazhdimisht vaksina të reja për çdo sezon të gripit dhe për çdo grip pandemik që shfaqet është të krijohet një vaksinë që funksionon për çdo lloj gripi.
Në fakt, zhvillimi i një vaksine “universale” të gripit si kjo ka vite që po mendohet të realizohet nga rkspertët. Por asnjëri nuk ka pasur prova të sigurisë dhe efektivitetit. (The Guardian)