Deputeti i Partisë Socialiste, Bujar Çela ka shpërthyer në akuza në adresë të presidentit Ilir Meta dhe ish-kryeministrit Sali Berisha. Këtë të fundit thuajse në çdo reagim i bëjnë thirrje qytetarëve që të ngrihen dhe të përmbysin qeverinë “Rama”.
Por gjatë një prononcimi për gazetën “SOT”, deputeti Çela u shpreh se thirrjet e presidentit Meta dhe ish-kryeministrit Berisha për revolucion janë dëshpëruese, ndërsa i bëri apel prokurorisë që të vihet në lëvizje, duke çuar para drejtësisë këta 2 politikanë, pasi sipas tij, mbi ta rëndojnë shumë akuza dhe duhet të arrestohen.
“Pseudopresidentit i kanë hapur një garë për t’i siguruar një vend nderi në opozitën e ardhshme, se tani për tani e ka siguruar kohën e mbetur në Presidencë dhe kjo në varësi të punës që do bëjnë dy strukturat e piramidës në drejtësi.
Nuk mund të kërkojmë sjellje normale nga ky njeri, president, udhëheqës real i opozitës i kësaj opozite rrugë humbur. Të gjitha thirrjet e tij janë të përsëritura dhe të prodhuara nga lideri i tij shpirtëror, shoku Sali, të cilat dhe këtë radhë në Ditën Ndërkombëtare të Rinisë si dhe herët e tjera si dekreti i famshëm që do firmosej në mes të sheshit, do t’i sigurojnë dështimin me shumë sukses të radhës.
Ai është bërë për të ardhur keq se ka humbur rrugën njëherë e përgjithmonë. Në këtë rrugë, garë ka vetëm me të çmendurin që ka vite që e fiton po idhullin e tij Sali Ramë Berishën. Këto thirrje janë antikushtetuese dhe një akt akuzë e pastër ku strukturat e drejtësisë dhe Prokurori i Përgjithshëm nuk duhet t’i bëjë më sehir, por duhet të urdhërojë prangosjen e tij”, deklaroi ai.
Më tej deputeti i PS, Bujar Çela u shpreh besimplotë se qytetarët shqiptarë do t’i japin një mandat të tretë Partisë Socialiste në zgjedhjet e ardhshme parlamentare të vitit 2021. “Motorët e Partisë Socialiste nuk rindizen, por ata nuk fiken asnjëherë. Ne jemi gjithmonë në punë me njerëzit për njerëzit dhe bashkë me ta, si aleati jonë më i mirë i zgjedhur përfundimisht që në Qershorin e 2013-tës dhe bashkërisht punojmë çdo ditë dhe po bashkë do sigurojmë fitoren e radhës në vitin 2021.
Kanë shumë arsye pse duhet të na besojnë, ka shumë punë të bëra në të gjithë territorin nga jugu në veri si dhe punët që vazhdojnë të bëhen me ritme nga më të lartat! Kështu që populli duhet t’i besojë vetes si aleati i kësaj qeverie dhe i Partisë Socialiste. Nuk besoj se ka nevojë për ta provuar me shije të floririt të Kërrabës, Gërdecit, 21 Janar apo çmenduritë e dyshes kriminale Berisha- Meta dhe thirrjet e tyre ogurzeza etj., etj. që vetë qytetarët i kanë në memorien e tyre pa harruar dhe 1997-ën”, nënvizoi deputeti i PS, Bujar Çela.