Për herë të parë që prej kalimit tek Evertoni, Armando Broja do të ketë shansin ta nisë ndeshjen si titullar, e bëhet fjalë për sfidën ndaj Manchester Cityt. Ky është lajmi që po qarkullon në mediat britanike në prag të javës së 18-të të Premier League, ku skuadra në të cilën aktivizohet ylli shqiptar, përballet me “the Citizens”. Broja duket se e ka bindur teknikun Sean Dyche, me këtë të fundit që i thuri elozhe lojtarit pas përballjes me Chelsean, që përfundoi me rrjeta të paprekura.
Jo vetëm kaq, por edhe performanca e Dominic Calvert-Lewin nuk ka qenë premtuese, duke bërë që 23-vjeçari të ketë më tepër gjasa për të luajtur në krahasim me lojtarin britanik. Broja e ka kaluar plotësisht lëndimin dhe është i gatshëm për ngarkesën e plotë sipas mjekëve, ndaj Manchester Cityt do të luajë si titullar. Dyche ka përpiluar listën me disa ndryshime në formacion, dhe një prej tyre është ai i lojtarit kuqezi.
Evertoni numëron 16 pikë në 16 javë të luajtura, ku ende nuk e ka kaluar rrezikun, pasi ndodhet shumë pranë zonës së ftohtë në klasifikim.