Me një urdhër gjykate në dorë dhe e mbështetur nga Forca Speciale për rast rezistence, hetuesit e BKH-së kanë ushtruar kontroll të imtësishëm në banesën e drejtorit të Rrugëve, një degë e rëndësishme e Ministrisë së Infrastrukturës.
Kontrolli vjen disa ditë pasi SPAK ka marrë të pandehur Arian Krajën, ish sekretar i Përgjithshëm në ministritë e Mbrojtjes, Shëndetësisë dhe Finanvave, i njohur si sekser i oligarkut Tan Dulaku dhe dora e zezë e Mimi Kodhelit, Ogerta Manastirliut dhe Anila Denajt.
Kontrolli në banesën e Evis Berberit është kryer në kuadër disa çështjeve penale që ka hapur SPAK-u për afera të dyshuara korruptive me tenderat dhe koncensionet e rrugëve.
Ndërkaq, sipas burimeve, kreu i SPAK-ut, Altin Dumani ka nisur dje një skuadër të BKH-së për verifikuar rrugën Korçë-Ersekë, sidomos pjesët e shembura, një investim mbi 65 milionë euro. (Dumani pritet të marrë në dorë edhe dosjen e Rrugës së Arbërit, ndërsa një kallëzim penal pritet të regerohet në SPAK për këtë rrugë që ka shkuar sa Rruga e Kombit, duke u shembur ende pa përfunduar).
Më 4 prill 2022, kreu i ARRSH-së, Evis Berberi, ka shpallur kompaninë A.N.K të Agim Kolës, fituese të lotit të dytë, pjesa e dytë e rrugës Korçë-Ersekë. Janë skualifikuar të gjitha kompanitë në garë përveç fituesit. Oferta fituese është rreth 21 milionë euro, gati sa fondi limit. Tenderi është shënjuar me flamur të kuq korrupsioni.
Agim Kola, vëllai i ish deputetit të PS, Ndue Kola, kishte fituar me pazar në tavolinë edhe lotet e mëparshme të kësaj rruge. Kumbari i këtij pazari me paratë publike besohet se është i njëjti oligark mediatik, protagonist i pazarit 300 milionë euro për rrugën e florinjtë Milot-Balldre, me gjatësi 17 km, duke u kthyer në rrugën më të shtrenjtë në Evropë, tre herë më shtrenjt se sa në Gjermani. Kjo aferë është pezulluar përkohësisht.
Por, nuk përjashtohet mundësia që të aktivizohet sërish, siç ndodhi me Milot-Fier, koncensionin 1.2 miliardë euro, me përfitues kryesor Bashkim Ulajn, bankomatin e Familjes Berisha.
Janë shifra që shkojnë përtej Evis Berberit. Nuk ka dyshim se Evis Berberi nuk ka peshë dhe këllqe për të vulos asnjë nga këto pazare, por thjeshtë për t’i zbatuar, duke kopsitur letrat.
Kopsitja e letrave mbart gjithnjë rrezikun për të shkuar i pari në burg dhe madje edhe për të bërë burg për shefat dhe oligarkët përfitues.
Evis Bereri duhet t’i ketë marrë parasysh këto pasoja dhe për këtë rrezik ka marrë pjesën e tij të vogël. Por pjesa e vogël në tendera dhe koncesione qindra milionë euro, është disa milionë euro, për të mos thënë dhjetëra milionë euro.