Pas deklaratës që Luli bëri para një auditori virtual, ku akuzoi qeverinë se ka çuar 8 vite dëm, në këto katër vitet e fundit, Bilushi i Metës doli me një deklaratë për gazetarët, ku mbronte Lulin për thellësinë e deklaratës së tij:
“Të dashur gazetarë!
Deklarata e Lulit, që disa rilindas të Edi Ramës duan ta quajnë si gafë, në fakt është një filozofi e tërë e ndërtuar prej tij mbi atë që ka ndodhur në Shqipëri.
Ajo ka lidhje me LSI.
Kur Luli thotë që Edi Rama “ka çuar dëm tetë vite në këto katër vite”, ka parasysh se deri më 2017 në vend ka qeverisur LSI 8 vite.
Katër vjet me PD dhe katër vjet me PS.
Në vlerësimin e tij, Luli mendon se periudha e bashkëqeverisjes së Shqipërisë nga LSI është historia më e mirë e Shqipërisë.
Ai ka vizionin dhe predispozicionin të mos mbajë qëndrim politik as ndaj mandatit të parë të PS me LSI, se në fund të fundit, është përgjegjësi e Doktorit që humbi.
Ndaj ai kur thotë tetë vite qeverisje, e ka fjalën për tetë vite qeverisje të LSI që u çuan dëm në këto katër vitet e fundit, pas 2017, pasi e hoqën LSI nga pushteti.
Këtu, jo vetëm që nuk ka asnjë gafë, por ka një vizion lideri mendjehapur, që vlerëson kundërshtarët dhe partnerët më shumë se PD.
Ky është shembulli se si ne duhet të gjykojmë të tjerët, pa komplekse dhe pa pengesa ideologjike.
Lul Basha e ka bërë këtë për të treguar se ai e meriton një koalicion të ri me LSI, për të shpëtuar këto 4 vitet e humbura të Shqipërisë që ka qeverisur Rama vetëm.
Me këtë deklaratë, ai ka dhënë prova se është besnik i LSI dhe një admirues i madh i saj.
Ne e respektojmë këtë deklaratë dhe do ta reflektojmë këtë respekt në raportet me PD”.