Tori alias Hektor Xhecuka, 30 vjeç, është vënë në pranga si autor i dyshuar i vrasjes së Emiljano Boçit në Tiranë. Xheçuka dyshohet se është paguar për të kryer atentatin, thanë burime pranë grupit hetimor.
30-vjeçari është person me precedent të mëparshëm penal. Ai është arrestuar në 25 Shkurt 2015 në pikën kufitare 3 Urat në Përmet. Në atë kohë, Xhesuka ishte shpallur në kërkim nga Policia e Tiranës për vrasje me dashje të mbetur në tentativë.
Kush është Hektor Xheçuka
Detaje të reja janë zbuluar lidhur me Hektor Xhecukën i arrestuar nga Policia si autori i vrasjes së Emiljano Boçit në Tiranë në muajin Janar 2018. Burime bëjnë me dije, se Xheçuka dyshohet se është pjesë e një grupi kriminal që vepron në zonën e Kamzës.
Në këtë vrasje, Xheçuka dyshohet se ka bashkëpunuar me dy persona të tjerë, për të cilët është duke u hetuar për të zbuluar identitetin e tyre. Xheçuka dyshohet se është vrasës me pagesë.
Gjithashtu mësohet se Xheçuka dyshohet se ka lidhje me anëtarët e grupit të Shullazit në Tiranë dhe ka qëndruar për një kohë i fshehur në ambjentet e një biznesmeni në Kamëz.
Hektor Xheçuka është arrestuar në vitin 2015 pasi është akuzuar për ‘Vrasje me dashje mbetur në tentativë’. Ai u lirua pasi nuk u gjetën prova. 30-vjeçari cilësohet si një “killer” i cili është paguar për disa vrasje në vend.
Burime nga policia bëjnë me dije se kemi të bëjmë me një ndër vrasësit më të rrezikshëm në Shqipëri. Gjithashtu mësohet se ai është zbuluar me prova shkencore.
Deklarata e policisë
“Policia e Tiranës në bashkëpunim me Prokurorinë e Rrethit Gjyqësor Tiranë identifikojnë autorin e dyshuar të ngjarjes se ndodhur më 14 Janar 2018 ku mbeti i vrarë Emiljano Boçi.
Identifikimi i autorit të dyshuar pas një hetimi disa mujor me metoda speciale të hetimit nga Seksioni për Krimet e Rënda në Drejtorinë Vendore të Policisë Tiranë në bashkëpunim me Prokurorinë e Rrethit Gjyqësor Tiranë.
Kapet dhe vihet në pranga Tori (Hektor) Xhecuka, 30 vjeç, lindur në Burrel dhe banues në Tiranë, për veprën penale të ‘Vrasjes me paramendim’ e kryer në bashkëpunim dhe të ‘Prodhimit dhe mbajtjes së armëve luftarake’”, bënë me dije burime zyrtare nga Policia.
Sipas Policisë, Xhecuka është autor i dyshuar i ngjarjes së ndodhur në datën 14 Janar 2018 në rrugën ’Shefqet Musaraj’, ku mbeti i vrarë shtetasi Emiljano Boçi dhe mbeti i plagosur Malvi Disha, mik i viktimës. Lidhur me këtë, ndaj Xhecukës rëndon edhe akuza e ‘Vrasjes së mbetur në Tentativë’ të shtetasit Melvi Disha.
“Për arsye hetimi në funksion të zbardhjes së plotë të kësaj ngjarje, nuk bëhen me dije detaje të tjera”, thuhet më tej në njoftimin e Policisë.
Atentati ndaj Emiliano Boçit dhe mikut të tij
Të dielën e 14 Janarit, Emiljano Boçi, me të dashurën e tij dhe mikun që i ishte kthyer nga Gjermania, Melvi Disha, kanë qenë duke ngrënë drekë në një restorant që ndodhet në rrugën “Shefqet Musaraj”, në një rrugicë në krah të Policisë Bashkiake në Tiranë. Ata kanë qëndruar për disa orë aty dhe kanë dalë rreth orës 17:50 nga lokali, duke hipur në makinën “Range Rover” të Boçit, që ishte e parkuar aty.
Në vendin e shoferit ka qenë i ulur 32- vjeçari Emiljano Boçi, i cili njihet edhe me emrin Roland apo Landi, në krah të tij ka qenë e ulur e dashura, ndërsa në sediljen pas tij ishte ulur 26- vjeçari Melvi Disha. Makina nuk ishte ndezur ende, kur një person ende i paidentifikuar, ka qëlluar 5 herë nga mbrapa saj, në drejtim të shoferit. Sipas Policisë, në këto rrethana sqarohet se objektiv i atentatit, ka qenë Emiljano Boçi.
Por duke qenë se shoku i tij ishte në të njëjtin drejtim me të, në sediljen e pasme, ka mbetur i plagosur edhe ai. Burimet thanë se atentatori dyshohet të ketë qenë duke e pritur Boçin dhe ka studiuar të gjitha lëvizjet e tij. Në momentin që ka dalë nga lokali, ai ka pritur momentin që të hipte në makinë dhe ka qëlluar.
Një mik i viktimës, që ndodhej gjithashtu në lokalin ku ata kishin drekuar, ka dalë jashtë rastësisht pak momente pas ngjarjes. Kur ka parë se çfarë kishte ndodhur, ai ka hipur në makinën e Emiljano Boçit dhe i ka transportuar në Spitalin Ushtarak.
Sipas mjekëve, 32- vjeçari ka mbërritur i vdekur në spital, ndërsa në trupin e tij janë konstatuar tri plagë me armë zjarri. Plagët kanë qenë të gjitha në pjesën e pasme të trupit, një në qafë dhe dy të tjerë në shpinë.
Ndërsa 26-vjeçari Melvi Disha, ka pasur vetëm një plagë në shpatull dhe ndodhet jashtë rrezikut për jetën. Policia tha se në vendin e ngjarjes janë gjetur 4 gëzhoja model “Gfl Luger”, të kalibrit 9 milimetër. Ndërsa arma e përdorur për vrasjen dyshohet të ketë qenë me silenciator.
“Më datë 14 janar, në rrugën ‘Shefqet Musaraj’, duke lëvizur me mjetin tip ‘Range Rover’, persona të paidentifikuar, kanë qëlluar me armë zjarri shtetasit Emiljano Boçi, 32 vjeç dhe Melvi Disha, 26 vjeç. Shtetasi Eemiljano Boçi, i dënuar më parë, ka ndërruar jetë gjatë rrugës për në spital, ndërsa Melvi Disha ndodhet jashtë rrezikut për jetën.
Me cilësinë e provës materiale u gjetën e bllokuan 4 gëzhoja model ‘Gfl Luger’, 9 mm dhe pamjet filmike të bizneseve në vendin e ngjarjes. Punohet për identifikimin dhe kapjen e autorëve. Nenet 78, 78, 22 e 278/2 të Kodit Penal”, thuhet në njoftimin zyrtar të Policisë së Tiranës pas atentatit.
Vendi ku ndodhi atentati ndaj Emiljano Boçit, në mes të një blloku pallatesh në krah të Policisë Bashkiake, duket se është zgjedhur jo më kot nga autori i ngjarjes. Zona edhe pse shumë e populluar, nuk ka ndriçimin e mjaftueshëm dhe ka disa rrugica që e kanë favorizuar atentatorin për t’u larguar pa rënë në sy të banorëve.