Ish-kryeministri, Sali Berisha iu është rikthyer sulmeve në adresë të ambasadores së Shteteve të Bashkuara të Amerikës në Tiranë.
Teksa ishte i ftuar në një studio televizive, ish-kryeministri Berisha hodhi akuza ndaj ambasadores Kim, ndërsa premtoi do të ankohet tek Departamenti Amerikan i Shtetit me provat e ndërhyrjeve të saj në Shqipërisë, që sipas tij, është një shkelje flagrante e diplomacisë, referuar Konventës së Vjenës.
“Po të mos ishte ndërhyrë para dy javësh në vendimin e gjykatës, unë mund ta vlerësoja një qëndrim të tillë por kur e di se ndërhyri me gjithë autoritetin e saj për të marrë një vendim që nuk është marrë kurrë, nuk mund të kem ndonjë vlerësim të veçantë sepse në radhë të parë është zonja që duhet të respektojë sistemin e Drejtësisë në këtë vend.
Unë e them këtu, kam respekt të palëkundur për presidentin e SHBA-ve, por Kim po sillet si guvernatore. Por nuk mund të besoj kurrë që përfaqësuesit e tij të ndërhyjnë në proceset gjyqësore të një vendi. Mendoj se ajo ndërhyrje e bërë shumë, ishte një sulm i madh kundër pluralizmit në Shqipëri sepse aty është bërë e qartë se çfarë përfaqëson ai grup i vogël.
Dhe të mendosh ti se mund të mbash ata si kryetarë opozite nuk mund të bësh kurrë diçka të tillë. Prandaj nuk kam asnjë impresion ndaj deklaratave të saj. Nëse qeveria amerikane është e interesuar për fakte konkrete, unë do ua jepja me kënaqësi. Unë nuk mund ta besoj kurrë që qeveria amerikane, presidenti i SHBA të jenë për të diktuar vendimet anti-ligjore të gjykatave në Shqipëri”, deklaroi ai.
Ndërkohë Berisha foli për mediat dje edhe pas mbledhjes së Komisionit të Rithemelimit, teksa theksoi se presidenti i ri duhet të jetë figurë politike. Ndalur në kriteret që ka vënë Enkelejd Alibeaj, Berisha thotë se janë të dala nga zyra e Edi Ramës.
“Vërtete nuk është post ekzekutiv s’do të thotë që nuk është politik. Çdo parashikim tjetër ose kriter tjetër kundër këtij kriteri është i gabuar, është i stisur dhe no sens. Në rast se e keni fjalën për kriteret ka një deklaratë se si i vlerëson Alibeaj, janë të dala nga zyra e Ballës apo Ramës. Dokument që ka synim tjetër vetëm të zgjedhë presidentin që do Edi Rama”, nënvizoi Berisha.