Kryeministri Edi Rama tha mbrëmjen e sotme nga aeroporti i Rinasit se se gjatë kësaj jave vaksinimi anti-Covid do të shtrihet edhe në dy qytete të tjera, përkatësisht në Vlorë dhe Shkodër.
Gjatë pritjes së dozave të reja të vaksinës së Pfizer në Rinas, kreu i qeverisë deklaroi se po këtë javë përveç bluzave të bardha, do të nisë vaksinimi edhe te më të moshuarit.
“Jemi duke pritur që sipas kontratës kompania Pfizer të na lejojë që të zbatojmë edhe marrëveshjen me atë shtetin tjetër, që solli dozat e para.
Në kontratën që Pfizer bën me vendet e tjera, për çdo lëvizje të kësaj natyre duhet aprovimi i Pfizer dhe ne nuk mund të aktivizojmë këtë sasi pa aprovimin e Pfizer.
Me ardhjen e këtyre dozave sot dhe me pasjen e një qartësie për ato 40 mijë doza që janë konfirmuar, ne do fillojmë shtrirjen e vaksinimit gjatë kësaj jave në Vlorë dhe në Shkodër, dhe po ashtu hap pas hapi, në varësi nga kalendari i ministres, edhe në Elbasan, Fier.
Paralelisht me vaksinimin e mjekëve dhe bluzave të bardha, do të bëjmë edhe fillimin e vaksinimit të më të moshuarve.
Kemi të gjitha arsyet të jemi të bindur se ne mund ta realizojmë objektivin e vaksinimit të plotë për 14 muaj. Është vetëm çështje konfirmimi të sasive dhe disponimi të sasive.
Me këtë lëvrim të Pfizer do të injektojmë masivisht vaksinën dhe me shpresë se në javët në vijim do të marrim konfirmime të rëndësishme nga AstraZeneca, por edhe me komunikimet që po bëjmë me disa shtete të tjera mike. Problemi i vaksinës mbetet një problem serioz në mbarë Evropën.
Një gjë dua t’ua përsëris atyre që nguten të japin mend, se kjo nuk është çështje fondesh, ne nuk kemi asnjë problem fondesh.
Pra, vaksina nuk është në treg, që pret që blerësit të shkojnë ta marrin. Kjo nuk është një çështje vendesh të pasura apo të varfra, sepse ne nuk jemi në vendet e pasura dhe kemi një kontratë.
Në rajonin tonë janë disa vende që nuk kanë asnjë plan konkret për të nisur vaksinimin. Mos më fusni në sherre me BE, që mbetet pika jonë e referimit.
Është krejtësisht e padrejtë, e pajustifikueshme, që popujt në këtë zonë, mu në mes të BE, të rrinë të numërojnë sa vaksina u bënë në Greqi, në Itali, nëpër Evropë, ndërkohë që vetë presin të bëjnë vaksinën e parë.
Apo të shohin Serbinë që bën mijëra vaksina kineze, edhe pse është në mes të Evropës. Nëse i është drejtuar Kinës, kjo ka ndodhur, sepse ndryshe edhe Serbia sot do të ishte njësoj si ne”, tha Rama.