Bashkimi Europian ka akorduar 69.4 milionë euro për Shqipërinë në kuadër të nisjes së procesit të negociatave për integrim në BE, saktësisht në bazë të Instrumentit të Asistencës së Paraaderimit IPA III.
Ky fond do të ndihmojë qeverinë shqiptarë të investojë në 5 fusha: drejtësi, e drejta e pronësisë faza II, natyra, ekonomia qarkulluese me rritjen e gjelbër dhe novacioni faza II.Kjo marrëveshje do ekzekutohet deri në 12 vjet pas miratimit dhe zbatimi operacional parashikohet brenda 6 viteve nga nënshkrimi i saj.
Sipas dokumentit, në fushën e drejtësisë do të mbështeten autoritetet shqiptare nëpërmjet investimeve kyçe dhe ngritjes së kapaciteteve në zbatim të Reformës në Drejtësi dhe rritjen e transparencës në sistemin e drejtësisë. Në marrëveshje theksohet se prioriteti aktual i Reformës në Drejtësi është nevoja urgjente për modernizimin e teknologjisë së informacionit, në mënyrë që të gjenerohen statistika të nevojshme për ecurinë e funksionimit të gjykatave dhe organeve të tjera të drejtësisë.
Për këtë fushë janë parashikuar të investohen 8 milionë euro. 4 programet e tjera do të financohen respektivisht: e drejta e pronësisë faza II (10 milionë euro), natyra (6 milionë euro), ekonomia qarkulluese dhe rritja e gjelbër (30.9 milionë euro) dhe novacioni 10 milionë euro.