Për Bamir Topin, Lulzim Basha është personi juridik i Partisë Demokratike. I ftuar në Radar Informativ me Juli Xhokaxhi,Topi duke komentuar situatën para zgjedhjeve të pjesshme lokale, tha se Komisioni Qëndror i Zgjedhjeve do të regjistrojë vetëm kandidatët e Bashës.
“Ai është personi fizik dhe juridik i PD që në KQZ do të përkthehet si partia që do hyjë zyrtarisht në zgjedhje. Askush tjetër që është jashtë nuk mund të pranohet. Pjesa juridike është kjo.
Nuk ka asnjë lloj shansi askush përveç përfaqësimit zyrtar. Në zgjedhjet e dekretuara do të pranohet nga KQZ vetëm kandidaturat e formatit zyrtar. Ata të Berishës hyjnë me statusin e individit të pavarur”, tha Topi.
Megjithatë, ish-presidenti thotë se zgjedhjet e 6 marsit do të jenë një test për dy palët që prej muajsh i tregojnë forcën njëra-tjetrës.
“Është një test, i ngjan këtyre të Covid. I shpejti të jep një indikacion, por monekulari është ai që të certifikon. Me këtë çarje problemet janë të mëdha. Ekuacioni është i qartë, por ka të panjohura”, u shpreh Topi.
Topi vlerëson se në vend nuk ka më opozitë. Duke komentuar situatën politike, ish-kreu i shtetit deklaron se opozita nuk ekziston. Sipas Topi, demokratët tashmë të ndarë në dy pjesë e kanë problemin me njëri-tjetrin.
“Për mua opozita nuk ekziston. Të thuash apo dobësohet do të thotë…sot nuk ekziston. Çështja është e dominantit. Çfarë dominanti ka njeriu që drejton opozitën? Kanë kryeministrin? Jo. E kemi problemin me Ramën thonë, por e kanë me njëri-tjetrin.
Ata kanë kërkesa minimaliste dhe nuk e shohin si detyrë për të thyer qeverinë. Në mendje kanë si ti hanë kokat njëri-tjetrin”, tha ai.
Nisur nga kjo situatë, Topi thotë se kryeministri Edi Rama është në dëlir. Sipas tij ai futi duart në Kushtetutë në vitin 2008 dhe ata që e lejuan po e pësojnë më shumë.
“Edi Rama është në delir. I ka futur duart në 2008 dhe po i gëzohet asaj. Ndërsa mjeranët që i kam paralajmëruar mos fusni duart te Kushtetuta po e pësojnë.
Ky është rasti më i keq i mundshëm për një vend që të mos kosh opozitë. A do vazhdojë? Është një pikëpyetje e madhe. Nuk është mirë kur i ke të gjitha pushtetet vetë sepse nesër nuk do kesh mundësi për alibi”, tha Topi.