Radio Televizioni Publik Shqiptar vazhdon të trajtohet si pronë private për të kënaqur orekset e kujtdo që ka sadopak pushtet brenda këtij institucioni, që paguhet me taksat e qytetarëve dhe duhet t’u shërbejë atyre.
Që prej dorëheqjes së Alfred Pezës, RTSH ka mbetur pa drejtor të përgjithshëm. Këshilli Drejtues ka komanduar Aurora Polon, një kukull që përdoret nga kryetari i Këshillit Leka Bungo, të cilit i ka ardhur momenti për të përmbushur ëndrrën e kahershme për të drejtuar personalisht punët në RTSH.
Megjithëse Kuvendi i është drejtuar me një kërkesë Këshillit Drejtues të RTSH më 25 tetor, duke i lënë një afat 30 ditor për hapjen e garës për drejtorin e përgjithshëm, ky organ vazhdon të injorojë ligjvënësit. Me shumicë votash anëtarët e këshillit drejtues nuk e miratuan hapjen e garës dhe argumentuan se nuk ka kohë fizike deri në fund të vitit 2024, për shkak të angazhimeve të tjera me programet e fundvitit.
Por kujt i interson mbajtja e kukullës Aurora Polo në krye të RTSH? Sigurisht që kryetarit të Këshillit Leka Bungo, i cili i i tha Kuvendit që nuk ka tagër të zhbëjë vendimet e paligjshme të ish-drejtorit Alfred Peza, i cili shkarkoi nga detyra rreth 150 punonjës dhe detyroi të japin dorëheqjen dhjetëra të tjerë.
Leka Bungo dikton në mënyrë klienteliste vendimet e Aurora Polos për të rikthyer në detyrë vetëm miqtë e tij. Edhe në rastet kur vendi i punonjësit është i zënë Polo e gjen mundësinë për ti plotësuar dëshirën gjyshit të RTSH, i cili di të sillet si babaxhan me disa dhe si indiferent dhe si i pafuqishëm me disa të tjerë.
Këshilli ka mundësinë të shpëtojë RTSH nga falimentimi duke rikthyer në punë të larguarit në mënyrë të padrejtë nga puna, por nuk i intereson shumë kjo gjë. Disa ish-punonjës kanë fituar çështjen gjyqësore për shkarkimin e padrejtë nga puna dhe kështu marrin paga për shkarkimin e padrejtë, teksa ndodhen në shtëpi. Mirëpo kush mban përgjegjësi për miliona lekë që shteti u jep ish-punonjësve të RTSH që u shkarkuan padrejtësisht, para që mund të përdoreshin për investime publike?!
Prapaskena.com