Organi i akuzës së kryeqytetit ka kërkuar 38 vite burg për katër të pandehurit që akuzohen për atentatin e bëra ndaj aktorit Mishel Prela rreth një vit më parë. Gjykata e Tiranës zhvilloi dje seancën e radhës për 4 të arrestuarit për atentatin ndaj aktorit Mishel Prela, rreth 1 vit më parë në kryeqytet.
Procesi gjyqësor tashmë është në fazën përfundimtare të tij, ndërsa dje prokuroria lexoi konkluzionet përfundimtare për katër të pandehurit Ervin Zallumi, Shkëlzen Buci, Ermir dhe Miklear Tolën, duke kërkuar një total prej 38 vite e 2 muaj burg.
Kujtojmë se procesi gjyqësor ka pasur edhe dëshmitar të akuzës, ku një prej të pandehurve pranoi të bashkëpunonte me prokurorinë, duke treguar të gjithë skemën e përgatitur, për t’i marrë jetën Prelës, për një hakmarrje lidhur me një ngjarje të ndodhur vite më parë. Në seancën e djeshme, akuza e kryeqytetit, kërkoi për Ervin Zallumin, si porositësi i atentatit të dështuar, 18 vite burg.
Kujtojmë se në seancën e parë gjyqësore, të pandehurit kanë kërkuar gjykim të shkurtuar, duke përfituar zbritje të dënimit me 1/3-ën, kështu, përfundimisht për Zallumin prokuroria kërkoi 12 vite burg. Gjithashtu, edhe për të dyshuarin si vrasësi me pagesë, Shkëlzen Bucin, prokuroria kërkoi të njëjtin dënim, në përfundim, 12 vite burg.
Ndërsa për dy vëllezërit, Ermir dhe Miklar Tolën, kërkoi respektivisht, për Ermirin 8 muaj burgim, ndërsa për dëshmitarin e drejtësisë, Miklar Tolën, u kërkua shpallja i fajshëm dhe dënimin e tij me 1 vit e 4 muaj burg. Pas kësaj seance, priten edhe konkluzionet përfundimtare të mbrojtjes dhe pas kësaj, vendimi përfundimtar i gjykatës.
Por, dje pas përfundimit të seancës ka reaguar edhe e ëma e Mieshël Prelës, e cila nuk ishte aspak dakord e atë që kërkoi prokuroria për të pandehurit dhe më konkretisht për dy prej tyre, Ermir dhe Miklear Tolën. Ky i fundit përfitoi nga marrëveshja e bërë me prokurorinë, duke përfituar ulje të dënimit. Megjithatë, e ëma e Mishel Prelës tha jashtë ambienteve të gjykatës se kjo nuk është e drejtë, ndërsa thotë se ai nuk ka asnjë arsye të pendohet, nëse do të ishte kështu do të ishte dorëzuar, por ai është arrestuar nga policia.
Kujtojmë se pas ngjarjes së rëndë që ndodhi në korrik të vitit 2017, nëna e aktorit, ka treguar se djali i saj, edhe në gjendjen që ishte në spital, me gjysmë zëri i kishte treguar se atentatin, vetëm Ervin Zallumi mund ta kishte bërë, kjo për shkak të një zënke që dy të rinjtë kishin pasur në vitin 2010, zënkë për të cilën, Prela kishte bërë 3 vite burg.
Hetimet
Sipas prokurorit të çështjes, Adriatik Cama, i cili ka zbardhur rolet e të pandehurve në këtë ngjarje të ndodhur 1 vit më parë, porositësi ishte Ervin Zallumi. Biznesmeni kishte punësuar për ta bërë këtë punë, tregtarin Shkëlzen Buci, i cili në dëshminë e tij ka treguar se në atë kohë, kishte pasur probleme ekonomike dhe se disa muaj më parë, i kishte vdekur vëllai i tij vetëm 25 vjeç dhe se për këtë, ata kishin marrë kredi.
Sipas Bucit, kjo është një nga arsyet se pse ka pranuar fillimisht të punonte për Zallumin, ndërsa pak kohë më pas ai i kishte kërkuar që të kryente vrasjen dhe në shkëmbim do të merrte rreth 80 mijë euro. 50 mijë euro në dorë dhe 30 mijë euro të tjera më pas, raporton SOT.Gjithashtu, në takimin e dytë të bërë me Ervin Zallumin, Buci ka thënë se ka regjistruar atë, që nëse i dilte nga fjala ta kishte si provë. “E regjistrova se mos më dilte nga fjala, -ka treguar Shkëlzen Buci, dhe pasi qëllova ndaj Mishelit, e mora në telefon atë, por ai kishte fikur telefonin dhe numri i tij nuk ekzistonte”, ka rrëfyer në polici Shkelzen Buci.
Por ajo që nxori zbuluar grupin, është një përgjim ambiental të kryer në komisariatin e policisë, ndaj Miklear Tolës, i cili kishte rolin e vëzhguesit të lëvizjeve të aktorit Prela. Në komisariat, Mikleari i ka thënë të vëllait të tij, Ermir Tolës se duhet të njoftonte personat në fjalë që t’i sillnin avokat se ndryshe ai do të fliste, ndërsa më tej, ka shtuar se ai nuk ka rrezik, pasi nuk ka qëlluar. “Unë nuk kam asnjë lloj rreziku, se s’kam shti”, mësohet të ketë thënë ai. 32-vjeçari Mishel Prela, u qëllua 8 herë me pistoletë nga Shkëlzen Buci, ndërsa vetëm katër plumba përfunduan në trupin e tij.
Në momentin e atentatit, Mishel Prela ishte duke lëvizur me një biçikletë, në një zonë mjaft të populluar, ndërsa sipas hetimeve, qëllimi i atentatit ishte eliminimi fizik i 32-vjeçarit.