Teksa po i drejtohej shtëpisë pas një nate të gjatë pune, një 40-vjeçari i ka dalë përballë një person i maskuar i cili i ka drejtuar armën dhe e ka qëlluar.
Një e shtënë është kryer dhe 40-vjeçari shqiptar me inicialet D. Q., është goditur në shpatull. Në spital autoritetet e çuan me helikopter. Fatmirësisht ai i ka shpëtuar vdekjes.
Lajmin e kanë përcjellë të gjitha mediat italiane si një tentativë të dështuar për ekzekutimin e shqiptarit që punonte si truproje në një kazino. Autori ende nuk është identifikuar, pasi fytyra e tij ka qenë e maskuar.
Në media shkruhet se gjithçka lidhet me një konflikt me bazë pasionin, duke mos dhënë shumë specifika se kush ka qenë shkaku i vërtetë. Shtohet më tutje se 40-vjeçari ka qenë kërcënuar dhe më parë, duke pasur parasysh dhe punën të cilën ai kryen.
Kujtojmë këtu se pak ditë më parë një tjetër atentat është kryer në Itali kundër qytetarëve shqiptarë. Ngjarja ndodhi të mërkurën. Një 24 vjeçar shqiptar me emrin Viktorjan Picaku u qëllua pas shpine me armë dhe vdiq në vend. Vetëm këtë të shtunë policia arriti të kapë dy vrasësit që ekzekutuan shqiptarin në një shesh të populluar të qytetit të Barit.