Kryeministri Edi Rama do të thërrasë pasditen e sotme Kryesinë e Partisë Socialiste, mbledhje kjo që do të prodhojë kandidatin zyrtar për Presidentin e ri të Shqipërisë. Prej fillimit të muajit prill kur nisën edhe procedurat për pasuesin e Ilir Metës, janë të shumtë zërat që lakohen se do të katapultohen në krye të Presidencës, ndërkohë që ky debat pritet të marrë fund sot, pasi Edi Rama do të zbulojnë para bashkëpunëtorëve të tij se kush do jetë Kreu i ri i Shtetit shqiptar.
Gazeta “Sot” ka mësuar se janë disa emra kandidatësh që ndodhen në tryezën e shefit të qeverisë dhe mazhorancës, teksa njëri duket se është më afër veshjes së kostumit të Presidentit të Shqipërisë. Bëhet fjalë për juristin e njohur Ardian Dvorani, emër ky që mësohet se i është propozuar Ramës nga amerikanët.
Dvorani i cili njihet ndryshe si një nga armiqtë më të mëdhenj të presidentit në ikje, Ilir Meta dhe ish-kryeministrit Sali Berisha, për shkak se ka qenë në qendër të sulmeve e akuzave të tyre, ka shumë gjasa që të marrë dirën jeshile nga PS, për t’u votuar nesër në raundin e karter në orën 18:00 në Parlamentin e Shqipërisë si President i Republikës. Ky votimi bëhet me shumë të cilësuar dhe socialistë kanë shumë mundësi ta zgjedhin pasuesin e Metës edhe me 71 vota, duke qenë se në Kuvend kanë plot 74 mandate dhe që sëbashku me 3 të partisë së Dom Doshit shkojnë në 77.
Kjo do të thotë se Ardian Dvorani nëse gjithmonë Rama do të pranojë propozimin e SHBA që të jetë ai kandidati zyrat i Partisë Socialiste për president, ka shumë mundësi të marrë drejtimin e Presidencës për një mandat 5 vjecar. Mirëpo, zgjedhja e Dvoranit si President i Republikës së Shqipërisë do të tronditë dyshen Meta-Berisha, për shkak se për këtë të fundit ai nuk është gjë tjetër veçse një armik dhe kundërshtar i epur.
Pra, duket qartë që Shtetet e Bashkuara të Amerikës me këtë lëvizje, “vrasin” 3 zogj, pasi jovetëm që i fusin Edi Ramës “këmbët në një këpucë”, por i japin edhe Berishës dhe Metës një goditje të fortë, duke emëruar në krye të Presidencës një armik të tyre dhe një person me integritet siç është Ardian Dvorani.
Ja 3 kandidatët e tjerë që rivalizojnë armikun e Metës
Megjithatë, Ardian Dvorani nuk është i vetmi emër që lakohet për Presidenti i ri i Shqipërisë. Gazeta “SOT” ka mësuar se janë edhe disa emra, 3 prej të cilëve janë shumë të rëndësishëm dhe që ndodhen në tryezën e kryeministrit Edi Rama. Ato janë tre femra të njohura publike dhe që i përkasin fushës së politikës, diplomacisë dhe jurisprudencës. E para është Majlinda Bregu, ish-deputete e Partisë Demorkatike, njëherësh ish-ministre e Integrimit në qeverinë “Berisha” dhe që sot mban postin Sekretares së Këshillit të Bashkëpunimit Rajonal (RCC).
Emri i dytë është ai i Ina Ramës, ish-Prokurore e Përgjithshme e Shqipërisë dhe që aktualisht është pjesë e trupës së organeve të vetingut, siç është Kolegji i Posaçëm i Apelimit. Ndërsa kandidatja e tretë që është në tryezën e shefit të selisë rozë është Vlora Çitaku, ish-ambasadore e Kosovës në Shtetet e Bashkuara të Amerikës, njëherësh ish-ministre e Jashtme në qeverinë “Thaçi”, që aktualisht është nënkryetare e Partisë Demorkatike të Kosovës së drejtuar na Memli Krasniqi, subjekt ky politik që më herët është drejtuar nga ish-presidentin Hashim Thaçi. Ndërkohë burime nga Partia Socialiste theksuan për gazetën se janë edhe disa emra të tjerë kandidatësh për presidentin e ri që janë në listë dhe që pritet të diskutohen në mbledhjen e sotme të Kryesisë së PS.
Ja si Balla “nominoi” Bregun dhe Dvoranin
Por sa i takon emrave të Majlinda Bregut dhe Ardian Dvoranit për presidentit të ri, sinjale ka dhënë edhe kreu i grupit parlamentar të Partisë Socialiste, Taulant Balla. I pyetur dje në një studio televizive për zotin Dvorani dhe zonjën Bregu, emrat e të cilëve qarkullojnë nëpër mediat e Tiranës si kandidatura të mundshme për Kreun e ri të Shtetit, Balla ka anashkaluar një përgjigje të drejtpërdrejtë, duke vlerësuar figurën e tyre.
“Z. Dvorani është kampion i luftës kundër korrupsionit i shpallur nga SHBA dhe një emër tepër i rëndësishëm për drejtësinë shqiptare. Në qoftë se hidhet si kandidaturë për President, unë e votoj”, deklaroi ai, duke dhënë sinjale pozitive për një kandidaturë të mundshme të ish-kreut të KED-së për President.
Referuar Majlinda Bregut, një ish-funksionare e djathtë që tashmë ruan pozicionin e Sekretarit të Përgjithshëm të Këshillit të Bashkëpunimit Rajonal, Balla shprehu keqardhjen që opozita nuk propozoi emrin e saj për Presidente. “Kam vlerësim tejet pozitiv me znj. Bregu. Kam pasur raporte të mira kur ajo ka qenë në krye të komisionit të Integrimit. Natyrisht që kemi pasur edhe përplasjet tona kur ajo ka qenë pjesë e qeverisë së katranit, por më vjen shumë keq që opozita nuk e propozoi për Presidente”, nënvizoi Balla.