Ambasadori i Bashkimit Evropian, Luigi Soreca ka kërkuar të mos ketë më vonesa me reformën në drejtësi. Duke folur në konferencën e nivelit të lartë “Gjithçka ka të bëjë me drejtësinë”, Soreca u shpreh se avancimi i kësaj reforme, është element kyç për hapjen e negociatave, ndërsa tha se është një detyrë e përbashkët mes politikës dhe shoqërisë civile, të mos ketë ngadalësim në këtë rrugëtim.
Më tej, gjatë fjalës së tij, ambasadori i Bashkimit Evropian bëri thirrje të mos ketë vonesa të pajustifikuara për krijimin e SPAK dhe BKH. Gjithashtu, Soreca ripërsëriti se Bashkimi Evropian do të vazhdojë të jetë pranë Shqipërisë në këtë nismë. “Detyra kolektive tani është të shmanget ngadalësimi në mes të rrugëtimit. Ka shumë punë përpara dhe bashkëpunimi i vazhdueshëm është i domosdoshëm që të ketë sukses. Bashkimi Evropian do të vazhdojë të jetë përkrah jush. Për tre vitet e ardhshme, BE-ja do të vërë në dispozicion më shumë burime financiare, me 42 milionë euro të dedikuara për programin tonë të ri të drejtësisë. Kjo përfshin një zarf prej 34 milionë eurosh që do të kontribuojë drejtpërdrejt në buxhetin e Shqipërisë, nëse vendi jep rezultate në strategjinë e drejtësisë”, tha Soreca, gjatë fjalës së tij. Ambasadori i Bashkimit Evropian, vëmendje i dha edhe Gjykatës së Lartë dhe asaj Kushtetuese. Soreca tha se pritshmëria për funksionimin e këtyre dy institucioneve është shumë e lartë. “Pritshmëria është e lartë që të kemi Gjykatë të Lartë dhe Kushtetuese funksionale. Qytetarët mezi presin krijimin e BHK dhe SPAK. Detyra kolektive është të mos ketë ngadalësim në mes të këtij rrugëtimi”, u shpreh Soreca.
Ambasadori Soreca foli edhe për 18 tetorin në konferencë. Ai theksoi se, Shqipëria pa reformën në Drejtësi do ishte larg nga hapja e negociatave me Bashkimin Evropian. “Tani jemi dy javë larg nga një prej vendimeve më të rëndësishme në lidhje me të ardhmen e Shqipërisë. Pa reformën në drejtësi, është e qartë se vendi do të kishte pritur edhe shumë vite për të arritur situatën e sotme pak para këtij momenti të rëndësishëm, vite që populli i Shqipërisë nuk mund t’i humbasë. Reforma ka hedhur themelet për forcimin thelbësor të sektorit dhe konsolidimin e pavarësisë, paanshmërisë, profesionalizmit dhe llogaridhënies”, tha ambasadori i Bashkimit Evropian, ndërsa u shpreh se Shqipëria është e gatshme të kalojë në hapin tjetër.
Rama për mungesën e gjykatave
Kryeministri Edi Rama, gjatë fjalës së tij në konferencën e nivelit të lartë “Gjithçka ka të bëjë me drejtësinë”, tha se integrimi në BE është një rrugëtim të cilin Shqipëria e meriton, pasi sipas tij, vendi ynë i ka plotësuar kushtet e vendosura. Gjithashtu, duke cituar Angela Merkel, kryeministri tha se fakti që kërkohet që Gjykata Kushtetuese dhe e Lartë të jenë funksionale, nuk është faji i Shqipërisë, pasi pastrimi i sistemit ishte një kërkesë për të ecur drejt BE-së. “Tani problem është që nuk kemi Gjykatë Kushtetuese. Po, por ne na u tha që duhet të pastronim sistemin e drejtësisë nga të korruptuarit. Angela Merkel është kampione e kësaj gjëje dhe ajo ka thënë një gjë. Ne po themi që Shqipëria nuk ka Gjykatë Kushtetuese dhe që ky është dështim, më fal, por unë citoj kancelaren gjermane, a ishim ne që i kërkuam shqiptarëve që të pastronin sistemin dhe a kanë faj ata që e pastruan sistemin, e bënë atë dhe tani që u pastrua sistemi nuk ka Gjykatë Kushtetuese dhe duhet t’u hedhim faj për këtë gjë, apo t’i përgëzojmë për këtë punë që kanë bërë”, deklaroi Rama, ndërsa u shpreh se fakti që nuk ka Gjykatë Kushtetuese funksionale në këtë moment, tregon sukses jo dështim. /Ornela Çelpica