Kryeministri Edi Rama ka bërë një akuzë të fortë ndaj gjyqtarëve e prokurorëve gjatë fjalimit të tij, me rastin e 10-vjetorit të 21 janarit.
Ai ka thënë se gjyqtarë e prokurorë janë bërë bashkë dhe duan të rrëzojnë Qeverinë më 25 prill.
“Drejtësia do të bëjë të sajën dhe ata të cilët i vranë për herë të dytë dhe i vranë në bashkëpunim me njëri-tjetrin dhe me palë të treta të veshur në togën e zezë të gjykatësve, do të përgjigjen.
Do të përgjigjen siç do të përgjigjen të gjithë gjykatësit dhe prokurorët që sot janë angazhuar fort për ta bërë 25 prillin një referendum kundër kësaj qeverie, bashkë me udhëheqësin e referendumit”, deklaroi Rama.
Kreu i Qeverisë nuk përmend emra as gjyqtarësh e prokurorësh që akuzohen se shkalin statusin duke u përfshirë në fushata elektorale dhe as kush është udhëheqësi i referendumit.
Por, thirrje drejtuar qytetarëve që 25 prillin ta shndërrojnë në një referendum ka bërë shpesh presidenti Ilir Meta.
“Më 25 prill 2021 do të ketë një referendum mbarëkombëtar për të rrëzuar këtë sistem oligarkik, që kërkon t’i kthejë qytetarët shqiptarë në qenie pa vlerë, të pafuqishëm dhe të pambrojtur. Rivendosja e rendit kushtetues është e padiskutueshme”, thotë Meta.