Kreu i Partisë Agrare Ambientaliste, Agron Duka ka komentuar situatën politike në vend, ndërsa është shprehur se ka mbetur i suprizuar nga deklarata e Bashës, ku futi Berishën, Metën dhe Edi Ramën në “Trekëndëshin e Bermudës”.
Teksa ishte i ftuar ditën e djeshme në një studio televizive, zoti Duka theksoi se Basha s’ka takat të çmontojë “Trekëndëshin e Bermudës”, pasi sipas tij, kjo gjë ndodh vetëm nëse ai i sulmon tek e tek.
“Një përpjekje për ta shkëputur veten dhe për ta paraqitur si e ardhmja e politikës shqiptare, por nuk është se zuri vend, ajo që na bëri përshtypje ishte mënyra se si papritmas u prononcua dhe për presidentin, në politikë ndodhin edhe kthesa të tilla, por nuk besoj se janë të besueshme kur vjen nga një betejë e përbashkët, papritmas atë që kishe aleat, sot e rreshton dhe me Ramën.
Politikisht ai mendon se kështu fiton, po unë jam dakord që edhe taktikisht nëse do kisha kundërshtarë, do mundohesha që të harxhoja energji veç e veç, grupi bashkë e bën më vulnerabël. Në fakt këta të tre janë gjigantët e politikës shqiptare, kush guxon që t’i bëjë bashkë”, deklaroi ai.
Më tej zoti Duka është ndalur që të flasë edhe për “Foltoren” e Sali Berishës. Ai tha se mendon që pas 11 dhjetorit, pra kur është thirrur që të mblidhet Kuvendi Kombëtar i PD-së, Berisha mund të tërhiqet. “Pas 11 dhjetorit, mund të ketë një tërheqje, është fisnikëria më e madhe që mund të bëjë, në moshën 77-vjeçare, doli në bazë, mblodhi njerëzit dhe nesër nëse e ndihmon PD nga jashtë, është gjëja më e mirë që mund të bëjë”, u shpreh ai.
Ndërkohë zoti Duka zbuloi se aleatët nuk kanë bërë asnjë takim me Bashën. “Asnjë nga ato vendime që ne morëm nuk patën sukses, asnjë nga këto beteja nuk fituam, në 25 prill humbi opozita, morëm vendime jashtëzakonisht të gabuara. Nuk jemi takuar që pas zgjedhjeve të 25 prillit, në mënyrë institucionale, përveç kafeve”, nënvizoi kreu i Partisë Agrare Ambientaliste, Agron Duka.