Judicial Watch në Amerikë, prej disa ditësh ka nisur një fushatë sulmesh ndaj ambasadorit amerikan në Tiranë, Donald Lu.
Sipas këtij portali, Ambasada amerikane në Tiranë i ka dhënë miliona euro Fondacionit “Soros” për të kapur reformën në drejtësi dhe për të favorizuar Edi Ramën.
Akuzat në fakt, janë të përsëritura.
Kujtojmë që edhe një vit më parë, kur në Tiranë ishte ngritur çadra e Lulzim Bashës, ndërsa në Shkup Gruevski luftonte për jetë a vdekje për të mbajtur pushtetin, 6 senatorë amerikanë kërkonin hetimin e ambasadorëve amerikanë në këto dy vende, me pretekstin se financonin Sorosin.
Akuzat u konsideruan qesharake nga sekretari i Shtetit Tillerson dhe nuk u morën për bazë.
Por, ka diçka interesante që lidh sulmet e një viti më parë, me këto aktuale.
Bëhet fjalë për autorët që e sponsorizojnë këtë çështje.
Një vit më parë, në krye të senatorëve që nisën betejën anti-Soros, ishte Ted Cruz.
Deri këtu nuk ka asgjë të keqe.
Por, gjatë fushatës presidenciale të 2016-ës në SHBA, kreu i stafit të Cruz, është një emër i bërë i njohur së fundmi në Shqipëri: Nick Muzin.
Nick Muzin është nënshkruesi i kontratës së lobimit në SHBA, me Lulzim Bashën.
Pas kontratës së Muzin me Bashën, qendrojnë dy lobistë rusë dhe këtu lindin pikëpyetje të mëdha, se në shifrën e padeklaruar të 500 mijë dollarëve që ka paguar Basha, qendron dhe sulmi i fundit ndaj ambasadorit amerikan në Tiranë./TemA
