Ish presidenti i Republikës, Bujar Nishani ishte i ftuar në rubrikën ‘Opinion’ në News24, ku ka folur për aktualitetin politik si dhe rekomandimin pozitiv të KE për hapjen e negociatave të anëtarësimit. Nishani tha se mbetet shqetësim fakti se nuk ka debat nga analistët dhe ekspertët për fazat e integrimit të vendit. Nishani tha se vendimmarrja për hapjen e negociatave është politike.
“Doja të shikoja më shumë debat nga analistët dhe nga elita e shoqërisë mbi fazat e integrimit evropian. Për fat të keq nuk e kemi parë. Debati është politik dhe më pas media që përcjell opinionet e politikës. Në konceptin strategjik ne jemi në avantazh. Ku jemi sot? Mendoj që është një proces mbi shtrat politik. Edhe vendimmarrja për hapjen e negociatave është politike. Kemi një proces të BE që është një proces rajonal dhe nuk kemi një marrëdhënie të veçuar. Kërkojnë një bashkëpunim rajonal, por standardi nuk është i njëjtë. Edhe vendimi mendoj se do jetë politik. Ne duhet të jemi mendje hapur në aspektin e civilizimit. Aspekti politik është tek vendimmarrësit. Shqipëria dhe Maqedonia ka një avantazh pasi BE ka një politikë të konsoliduar”- tha Nishani.
Bujar Nishani tha se nuk është optimist se do ketë një anëtarësim të Shqipërisë në BE në dekadën e fundit. Ai u shpreh se nuk e shqetëson rrugëtimi që do kalojë Shqipëria deri në anëtarësimin e plotë, por nëse do arrijë të plotësojë kriteret dhe të jetë si vendet e konsoliduara të BE.
“Në deklaratat e ardhura nga vendet anëtare thuhet se duhet luftë ndaj korrupsionit dhe krimit të organizuar. Krimi i organizuar është një problem nder rajonal. Është një proces kompleks dhe ne na intereson si shoqëri se cili do jetë hapi dhe përfitimi i shoqërisë shqiptare dhe gjeneratës që vjen pas nesh. Ka një stalacion ndaj procesit të zgjerimit. Unë nuk jam optimist se do kemi anëtarësim në dekadën e ardhshme. Mua nuk më shqetëson rruga e gjatë që do përshkojmë deri tek anëtarësimi. Por ne duhet të demonstrojmë trendin rritës drejt atij që kanë sot vendet e konsoliduara të BE. Pra nuk më shqetëson rrugëtimi drejt BE sepse ne do arrijmë të plotësojmë këto standarde drejt kësaj rruge. Ky rajon ka një mekanizëm tek i cili qëndron i lidhur për të shmangur sfidat që ka kaluar dhe ka një mekanizim që e mban në një lloj presioni pozitiv dhe për të penguar influencat e huaja”- tha Nishani.
Pyetjes nëse duhet të ishte edhe kreu i PD Lulëzim Basha në Gjermani bashkë me kryeministrin Edi Rama, Nishani tha se ftesa ishte për Ramën dhe nuk kishte ftesë për delegacion parlamentar.
“Ka qenë një vizitë zyrtare dhe kancelarja ka ftuar kryeministrin. Nëse do kishte delegacion parlamentar mendoj e duhet të ishte edhe kreu i opozitës. Sot ishte ftesë zyrtare dhe nuk kishte arsye pse të ishte edhe kreu i opozitës. Por problemi politik nuk është në raport me procesin”- tha ish presidenti Nishani.
I pyetur se si e shpjegon faktin që PD pas një periudhe ribashkimi të fraksioneve po kthehet përsëri tek një skizmë e re, Nishani tha se ky fenomen ka qenë në vazhdimësi.
“Në fakt PD ndryshe nga PS e ka patur këtë fenomenin e skizmës pothuajse të pandërprerë, 93, 97, 2005. Unë mendoj edhe për shkak të mentalitetit dhe kulturës qytetare të atij grupimi njerëzish që i atashohen të djathtës.
Ka debate, nuk është se debatet sjellin kontribute pozitive. Debate të tilla patjetër që krijojnë probleme sepse rezultati i punës në një parti është tek kapitalizimi në një elektorat”, u shpreh ish-Presidenti Nishani.