Dalin në dritë faktet se përse gjyqtarët që shpallën të pafajshëm Ilir Metën nga videoja e famshme me Dritan Priftin u shfarosën nga vetingu. I vetmi që mbijetoi është Ardian Dvorani, i cili pati mendim paralel, ndërsa 4 të tjerët sot janë jashtë sistemit të drejtësisë. Majlinda Andrea u dënua për korrupsion, Arjana Fullani dhe Guzim Zenelaj dhanë dorëheqjen nga frika e vetingut, ndërsa Gani Dizdari ngeli në proces.
Por gazeta po tregon sot fakte se si këta gjyqtarë mbyllën sytë për aferën 700 mijë eurosh të presidentit Ilir Meta. Vendimi për Metën tregon qartë se përse 2 prej tyre u arratisën nga vetingu (por do jenë 15 vite jashtë sistemit), ndërsa tjetri u ndëshkua në të dyja shkallët e gjyqësorit. Gazeta po tregon sot detaje mbi provat që prokurori i çështjes Bujar Sheshi grumbulloi kundër presidentit, por gjyqtarët mbyllën sytë për skandalin në fjalë. Sheshi sot është anëtar i KLP, ndërsa ndaj tij pati një luftë të madhe për ta larguar prej andej përmes akuzave për lidhje me sigurimin. Por provat që ai ka dorëzuar për çështjen e videos Meta-Prifti tregojnë qartë se përse nisi lufta ndaj tij.
Meta 192 telefonat me biznesmenin
Të gjithë e mbajnë mend videon e famshme Meta-Prifti. Në atë video, përveç bisedës mes Metës dhe Dritan Priftit, bëhet dhe një telefonatë, ku përmenden 700 mijë euro dhe 7 për qind. Sipas prokurorisë, telefonata është bërë mes Ilir Metës dhe përfaqësuesit të Shoqërive Bashkimi i përkohshëm “Vëllezërit Tola” sh.p.k., shtetasi Agim Rrapaj. Ky është biznesmeni për të cilin Meta i kërkonte Priftit që t’ia jepte koncesionin e HEC-it dhe në këmbim do kishte 700 mijë euro dhe 7 për qind të aksioneve. Vetë Meta e ka mohuar dhe po ashtu dhe biznesmeni në fjalë.
Por prokuroria ka depozituar një provë të pakundërshtueshme. Së pari, tabutet telefonike kanë vërtetuar se Ilir Meta më datën 01.03.2010 në orën 13:28, gjatë kohës që ai ishte në takim në zyrën e Dritan Priftit, ka telefonuar zotin Rrapaj. Por prova që e fundos presidentin është se ata kanë pasur komunikim prej një vit bashkë. “Ndonëse në dëshminë e tij, të dhënë para gjykatës më datën 21.11.2011, shtetasi Bekim Halili tha se ai ka biseduar me Ilir Metën për problemin e ankandit vetëm në muajin qershor 2010, pra nuk pranon interesimin e tij të vazhdueshëm për të fituar ankandin, dëshmia e tij është e pabesueshme. Ai u shpreh se nuk kishte pasur komunikime telefonike të shpeshta me Ilir Metën, duke pretenduar se mik kishte vetë Dritan Priftin.
Analiza e tabulateve telefonike të numrit celular të përdorur nga ky shtetas tregon të kundërtën. Me Dritan Priftin ai ka biseduar për periudhën nga data 01.02.2010 deri më 01.02.2011 gjithsej 13 herë, ndërsa me të pandehurin Ilir Meta ai ka pasur gjatë po kësaj periudhe 192 telekomunikime. Vetëm në ditët që është shtyrë dhe do të zhvillohej ankandi ai ka biseduar 3 herë më datën 26.2.2010 dhe 12 herë më datën 10.3.2010, madje edhe pas mesnate”, thuhet në vendim.
Pikëpyetjet
Pra Meta, ministër në atë kohë, ka komunikuar me qindra herë me këtë person duke i ofruar favore. Por edhe pse taublatet telefonike tregojnë skandalin, gjyqtarët mbyllën sytë dhe e shpallën të pafajshëm, ndërsa tani i arratisen vetingut nga frika se do u zbulohen skandalet. “Kjo dinamikë e telekomunikimeve flet qartë dhe mbështet me fakte të pakundërshtueshme dëshminë e Dritan Priftit për interesimin e vazhdueshëm të pandehurit Ilir Meta që ankandi të fitohej nga shoqëria në pronësi të shtetasit Bekim Halili”, ka theksuar prokurori Sheshi. Këto tregojnë qartë se përse po sulmohet Bujar Sheshi dhe përse gjyqtarët që gjykuan Metën janë sot jashtë drejtësisë. /Kliti Topalli