Nëse jetoni në një fshat të largët, larg zyrave të shtetit, tashmë shërbimet publike do t’ju oforhen te dera e shtëpisë.
Agjencia e Ofrimit të Shërbimeve Publike të Integruara, ADISA, ka prezantuar zyrën e saj lëvizëse, një furgon me logon ADISA, që do të udhëtojë në të gjitha zonat ku qytetarët kanë vështirësi në përfitimin e shërbimeve publike.
Furgoni është i pajisur me një sportel ADISA ku mund të aplikohet për shërbimet publike, njësoj si në një zyrë ADISA.
Gjatë një interviste për ERTV, Drejtori i ADISA-s, Lorin Ymeri, prezantoi zyrën lëvizëse nga Zall-Herri, njësinë administrative ku furgoni u ndal për herë të parë.
“Kjo njësi ka qëllimin e thjeshtë të sigurojë akses në shërbimet publike për qytetarët dhe bizneset, në ato zona ku praktikisht mungojnë një sërë zyrash që ofrojnë shërbime publike për qytetarët.
E kemi nisur nga njësia administrative Zall Herr, ku ka qënë e mundishme që qytetarët të kenë akses në shërbimet publike. Në furgon mundësohen edhe shërbimet online përmes platformës e-albania.
Zyra lëvizëse do të jetë sipas një kalendari të parashikuar, do të vijë njëherë në muaj në zonë. Ne jemi në fazë pilotimi në disa njësi administrative të Qarkut Tiranë dhe Shkodër, javën tjetër në Baldushk, Shëngjergj dhe në Kërrabë.
Ky do të jetë një sportel normal, qytetarët mund të vijnë dhe do të aplikojnë për shërbime si të ALUIZNI-t, tatimet, shërbimet shoqërore, etj. Ne e e procesojmë pranë qendrës ADISA dhe përgjigjia ju vjen përmes postës shqiptare”, tha Ymeri.
Ymeri foli edhe për zgjerimin e rrjetit të zyrave ADISA në të gjitha bashkitë e vendit.
“Ne kemi vendosur zgjerimin e rrjetit ADISA, në Bashki si Shkodra, pastaj një zyrë të dytë në kombinat të Tiranës, kemi hapur qendër në Divjakë, në Patos dhe jemi duke punuar për të hapur qëndra të reja në Malësinë e Madhe dhe në Kukës.
Brenda këtij viti do të kemi një qendër në Lushnje dhe kemi filluar punën për qendrën e Elbasanit”, deklaroi Drejtori i ADISA-s.