Deputeti Halit Valteri, i cili është anëtar i Komisionit të ngritur për të hetuar presidentin Ilir Meta, në një intervistë për Top Channel, u përgjigj nëse 8 kërkesat e dërguara nga Meta Komisionit të Venecias dhe vetë-draft opinion paraprak e vështirësojnë hetimin.
“Nuk ia vështirëson aspak punën sepse komisioni Venecias shprehet qartë në rekomandimet që jep. Të presim datën 11 dhe të shohim si do të jetë rekomandimi përfundimtar. Nëse ata shprehen që presidenti i Republikës ka tejkaluar kompetencat atëherë nuk mbetet gjë tjetër veçse t’i kalojmë parlamentit për votim shkarkimin e presidentit të republikës dhe më pas vendos gjykata kushtetuese çfarë do të bëhet me fatet e presidentit”, deklaron Valteri.
Procesi faktmbledhjes thotë deputeti Valteri vijon.
“Kemi marrë dëshmitë nga disa institucione që të kemi sa më shumë fakte dhe prova për ti administruar në dispozicion të hetimit.Në dijeninë time ka patur institucione që janë vonuar ose nuk kanë kthyet përgjigje por institucioni i Kuvendit bashkë me komisionin hetimor ka marrë masat e duhura për t’i sjellë ato prova në teyezën e komisionit hetimor. Ka ende fakte dhe prova për t’u administruar”, sqaron ai.
Është e parakohshme thotë Halit Valteri të shprehet për reportin final të komisionit. Megjithatë thekson.
“Dihen qëndrimet e mia ndaj presidentit të Republikës personalisht ndaj tij jo si institucion. Për mendimin tim ai është kryetar i LSI dhe jo kryetar i shtetit tonë”, thotë Valteri.